睇電視直播議員辯論預算案，粗俗語言不絕於耳，做議員嘅，冇晒尊嚴，枉稱為「尊貴的」，似街市亂噏一通，如許冠傑歌詞，不知係佢地黐定我地黐。聽到瞌眼瞓之時，突然有英文在耳邊響起，乃石禮謙議員發言也，英文本是佢嘅母語，不過佢嘅廣東話與我地完全冇分別，故此佢在議事堂不講英文久矣。星期四呢日講乜呢？用英文大讚財爺噃，仲引用邱吉爾：Neverinthefield...wassomuchowedbysomanytosofew（石議員改了字眼）、引狄更斯OliverTwist：wewantmore及莎士比亞之威尼斯商人：apoundofflesh，最後仲用埋利物浦球迷戰歌，對財爺講youneverwalkalone，嘩，曾司長應該聽到眉開眼笑啩；然後口風一轉，批評政府政策嘞，立即轉用廣東話。點解讚人用英文，鬧政府用廣東話呢？諗咗一輪，先至明白石議員聰明絕頂，用不同語言針對不同嘅聽眾。
唔抵得佢咁鬼醒目，於是引用番邱吉爾，送一個短訊畀佢：Sothey﹝TheGovernment﹞gooninstrangeparadox,decidedonlytobeundecided,resolvedtobeirresolute,adamantfordrift,solidforfluidity,all-powerfultobeimpotent.
送出短訊唔駛幾秒，石議員就有回電，叫左丁山去飲下午茶，大家哈哈哈一番。呢個政府弊在不能堅持原則，搖擺不定，譬如不知誰人周圍放風，話明要打擊書商，不惜（一）將書價加入審批程序，（二）教育局招標出書，（三）引入大陸內地教科書，（四）開發電子書。一位在教育界有十幾年經驗嘅編輯，知道後唔知好嬲定好笑，對左丁山講：「第一招就係限價，相當於價低者得，不理質素，管制物價，第二項、第三項素來係政治大禁忌，教育局官員唔鍾意提起嘅，第四項係陳維安強項，但搞咗兩年，全無建樹。點解在呢個時候提出三項政府禁忌呢？完全冇政治警覺性。」呢啲咪就係adamantfordrift囉。曾特首競選時，好似引用過邱吉爾：「Giveusthetoolsandwewillfinishthejob。」特首呀，唔該你將呢類官員首先finishoff。