因為漏報減持俾證監罰咗7萬蚊，令一向低調嘅四叔親家、香港資源（2882）執行董事徐傳順（Alex）上星期得以見報。咁話晒俾人罰，仲要係號稱熱愛打老虎嘅證監，華華都好想知道Alex點解咁論盡做咗老虎！
孖住黃英豪無aware性質轉變
「家證監啲條例好複雜……」Alex話，查實佢單case有小小特別，佢嗰6%左右嘅香港資源股權，其實係同黃英豪一齊透過PerfectAce持有嘅，香港資源復牌後，佢做任何嘢都係透過PerfectAce做，根據佢自己一向對證監條例嘅理解，小股東做嘢唔使申報。為穩陣計，佢仲問埋律師，連律師都話報咗反而唔啱證監啲條例，所以佢就大安旨意唔申報。
Alex好明顯唔係好清楚證監條例，「雖然黃英豪係大股東，但我喺PerfectAce名下嘅香港資源股權，有一定話語權，喺咁嘅約定之下，證監嘅條例就唔再當我係一個小股東，PerfectAce就係一個信託人，而我同律師都無aware到呢個性質嘅轉變。」
佢又話，後尾知道就即刻申報番，但已經過咗3日呢個時限，「咁都係觸犯咗條例，對我嚟講有小小寃枉o架……係一個好微妙嘅安排，令我對證監嘅條例產生咗誤解！」
無端端減持，係咪同黃英豪之間發生咗咩事？Alex話，查實係佢同黃英豪透過PerfectAce共同揸住香港資源，做任何買賣都要經過好多審批申報，好唔方便，為免麻煩佢先至減持，賣咗啲優先股。
不過，千祈咪誤會佢起身唔玩，「4月8日我都增持咗500萬股普通股，呢啲股票會長期持有，情況容許嘅話，仲會不斷增持，我本身對公司前景好樂觀o架！女婿同親家都無減持。」咁又係，與其俾人罰錢，不如拎啲錢去掃多啲貨好過啦！
李華華
mailto:[email protected]