凌晨時分，置身銅鑼灣，想找個地方坐天光，除了老麥和翠華，還有維園。以為夜靜無人？實情拖友、板仔、吹水怪統統出動，比白晝更熱鬧；五更到，天未光，晨運客四方湧至；到上班時間，園區再變成長者和外國人的閒情天地。如此24小時不斷循環，聽聽幾位港島人，怎樣眼看維園的日夜變奏。
記者：蔡俊業
攝影：林栢鈞、陳陶鈞、周旭文
模特兒：Lowell@PureModels、Sansu
鳴謝：歐基、Jamie
維園的日與夜
清晨：最年輕的晨運客
清晨的維園，當四周還是漆黑一片，已依稀見到圍住中央草坪的緩跑徑有些人影，並斷續傳來跑步聲。他們清一色都是長者或中年人。
假若時光倒流回到數年前，緩跑徑上會多了一個後生仔，那是自小在銅鑼灣區長大的徐遠成（Adam）。「我就住喺百德新街附近，五年級（約七年前）嗰陣時好肥，日日朝早五點幾就自己一個落嚟跑圈，又會去籃球場練波，因為燈未開，咩都睇唔到，就只會練拍波、走籃，天光就返屋企冲凉再返學。」Adam生於籃球家庭，母親劉克先是前國手、父親徐增坪曾效力廣州軍區籃球隊，毗連天后的籃球場經常舉行家庭聚會，漸漸此地變成Adam的木人巷。「阿爸阿媽成日都帶埋我落嚟打波，一星期嚟幾次；直到三四年班就開始同大人打，有幾個曾經係港隊代表。」直到七年級後開始轉到學校練波，不久便到福建「跟操」再轉到安青，躋身甲一之列，去維園打波一度減少，到十年級又變得頻密，「嗰陣時放假，每日都call朋友落嚟或者去修頓，一打就打一兩個鐘；返學時就會坐半個鐘小巴過嚟，朋友唔得閒，就會跟阿媽、細佬一齊打，或者同球隊嘅朋友打，都會有人圍住睇，記得試過有女仔問我攞簽名。」Adam語帶害羞的說。來到今天，Adam早已揚名學界和本地籃壇，既效力福建，亦擔任香港國際男籃隊長，已有半年沒過來維園打閒波，暑假後更要暫停！事關早前他獲紐約大學賞識頒發獎學金，新學年入讀體育管理系，由維園打到紐約。
早上：太極高手數當年
來維園晨運的，不同時段不同規模。清晨四五點那班多為獨行俠，站在一角，自顧自扭扭手、搖搖頭，在緩跑徑慢走，或在平路倒後行鍛煉平衡。六點前後天開始光，音樂亭和中央草坪出現幾堆人，圍在一起做早操、耍太極，如學生上體育堂。
家住北角的蔡太在維園任教太極班逾廿年，每天準時六時半上堂，天天如是，既見證學生進步，亦目睹維園四周的演變。「以前嘅緩跑徑遠好多，後來將佢搬咗入嚟，塊草地就細咗。」昔日經常作為《城市論壇》直播場地的圓形音樂亭，還記得嗎？「記得，我哋以前都喺度搞大食會，將食物氹氹轉咁擺喺地下，以前個亭比家嗰個新嘅再近少少（中央）草皮。」從她口中，才知道對正糖街CEONeway的南亭廣場曾大幅改動，應該更少人知道了吧？「以前無呢個廣場，就喺家公廁個位（靠近高士威道），如果落雨我哋都會去嗰度做運動；跟住對出少少小型圖書館，即係家捉棋那個亭，旁邊有兒童遊樂場，有得打鞦韆同埋玩滑梯。」對於維園，她感情甚深，也極喜愛，「呢個係我哋唯一嘅市肺，真係唔可以無咗佢。不過我覺得近年搞得太多商業活動，基本上所有人都唔鍾意，因為一封就封好長時間。搞花展時草坪都唔畀入，惟有改去南亭廣場，百幾人逼嚟逼去實有磨擦。」
黃昏：香港Rapper之發源地
維園橫跨銅鑼灣天后，附近學校非常多，且多為名校：皇仁書院就在對面街，走遠一點便見到聖保祿書院，沿天后廟道一上就是庇理羅士女子中學，所以每逢午飯及傍晚時間，都是學生哥使用維園的高峯期，熱門地點當然包括足球場和籃球場。「以前嚟得呢個籃球場打波嘅學生主要係皇仁、蘇浙同埋聖貞德。」站在籃球場旁邊，勾起了馬米（MastaMic）一些學生時代記憶。至十六七歲懂事之前，馬米一直跟父母住在北角，曾入讀張祝珊英文中學，會考後轉到寶馬山培僑讀預科，維園是放課後的必蒲點。「嗰陣時嚟維園都係hea同埋打籃球，一直喺度hea，唔知hea咩，有時喺草地，有時喺球場，兒童遊樂場都試過，坐得耐可以去到八九點先返屋企。」我問，維園對他來說還有甚麼更重要的意義？他說童年，例如初戀，以及F.6遭踢出校，嘩，好爆！「表證係我成績唔達標，實際係因為我曳，搞到阿爸阿媽踢埋我出屋企，跟住就攞個紅白藍膠袋執晒啲嘢走，嚟到維園瞓咗兩日，那時啱啱係夏天。」他說當時瞓覺的位置就在山丘凉亭下方的小草坡，瞓前會去打波、跟其他街童飲酒，「喺度扮大人囉！」直到兩三日後有社工找到他，瞓維園才算結束。對於這段日子，他事後希望我不要寫，但我想，這些只是成長的重要印記吧！反正都已過去了，更重要的是現在的他已紅爆rap界，有「FreestyleKing」之稱，年初新作《10HKRapUp》紅爆YouTube，剛剛推出全新Mixtape《Thenewhope》，絕對是本地rap界風雲人物，連爸爸都大力支持他在rap界發展。
說到FreestyleRap，全港首個cypher活動（rapper街頭切磋）的舉行地點就在維園，馬米正是搞手之一。時為06、07年，「當時香港都無freestyle呢樣嘢，我哋算係第一班人，有六七個，由近泳池一直rap到遙控噴水池或者唱到去銅鑼灣，所以維園可以話係本港freestyle的發源地。」點解會在維園而不是其他地方？馬米笑言有關係亦無關係，「有關係：香港幾個大公園都無維園咁親民，無咁多唔同嘅人喺度，又o靚仔又阿叔；同埋因為近銅鑼灣，年輕人、潮人集中，成件事好似潮啲，如果放喺沙田公園就太老正。你亦可以話無關係：因為somehow維園無令到我哋參與人數增加，亦都唔係好多人嚟睇。」
深夜：少年板仔之鬥技場
夜深的維園依舊熱鬧，咦，但行一轉無得「照田雞」喎！大可以玩滑板。板仔們習慣凌晨過後到噴水池旁邊大電視下集合，切磋板技。上周五晚，我跟Eddie、Simon和Zon等人遇上了，Simon話之前有到過柴灣或者美孚的SkatePark，最後選擇維園，因為兩者感覺不同，「SkatePark會set晒嘢畀你去玩，但喺街就無，挑戰性強啲。」要挑戰的，包括眼下三級樓梯，旁邊的Eddie是暫時唯一可以成功挑戰的，他說揀維園因為有平滑路面，練平地花式較好，「唔似石屎路咁凹凸不平，一踎低就好難平衡。」阿Zon說喜歡這裏遠離民居兼通宵開放，星期五六最多人，最多試過同時有卅幾人一齊玩。
