容祖兒噚日喺奧海城出席「窩心甜品之旅」，同祖兒屬同一公司嘅蔡卓妍（阿Sa）、林峯，最近都是非多多，祖兒話前晚佢哋幾個返咗廣州出席音樂先鋒榜頒獎禮，佢仲變成阿Sa同林峯嘅傾訴對象。
阿Sa鍾意小朋友
有傳阿Sa前夫鄭中基嘅女友余思敏有咗，仲有指當日阿Sa唔肯同鄭中基生BB，祖兒聽到衝口而出話：「唔係喎！」現場記者當然追問落去，但祖兒馬上收口：「唔知呀，但阿Sa有成日話生，佢好鍾意小朋友，不過兩個人嘅事點拎出嚟講？鄭中基同阿Sa都有新生活啦。」
咁畀潘霜霜搞到雞毛鴨血嘅林峯又點呢？祖兒講笑話：「同佢飲啦！」唔通林峯要借酒澆愁？祖兒好抵死咁話：「酒入愁腸愁更愁，佢家好努力工作，冇乜大影響，呢次係好經驗，我哋陪佢飲，佢得到我哋嘅友誼，話好感動。」而前晚嘅頒獎禮，仲有鍾欣桐、李克勤、張敬軒同陳偉霆出席，場面分分鐘熱鬧過香港啲頒獎禮。