汪明荃（阿姐）與鄭少秋月初舉行的紅館演唱會雖然已經圓滿落幕，但阿姐因為不滿自己的fans座位不及秋官fans靚，而鬧爆主辦商丘亞葵大細超，她除在電台訪問發炮狂轟外，連日來更不停在微博繼續喪插。據悉丘亞葵不甘被阿姐連環開火，原定斟阿姐下月的登台演出，以及為她明年在紅館舉行的粵劇騷全部叫停。阿姐鬧走主辦商，保守估計損失百萬元進賬。
一連三場的「鄭少秋．汪明荃．喜多郎新紀元2011演唱會」本月2日結束，尾場當晚阿姐因不滿主辦商丘亞葵將較靚座位留給秋官fans，公然在台上向丘亞葵開火，翌日她又在商台訪問中炮轟丘亞葵大細超，指紅館最好的三區座位全是秋官fans，她的fans卻坐在二樓。雖然丘亞葵事後解釋阿姐部份fans門票不是經他購買，又指自己問心無愧，但阿姐怒氣未消，連日來不停在微博和網誌向丘亞葵開火。
斥安排失當又孤寒
日前阿姐在官網以逾千字向丘亞葵開火，她寫道：「唯一有點遺憾的，就是未能為廣大支持我的樂迷和朋友在場內爭取到較佳位置……知道這次的門票安排情況後，我還是努力向主辦單位據理力爭過，可惜最後三場演唱會下來，支持我的朋友仍然只能在觀眾席中靠邊坐。我和秋官闊別十二年，再次在紅館一同舉行演唱會，結果卻因為第三方有意無意的安排失當落得遺憾收場，我只能慨嘆自己似乎是白做了……自己卻連基本的尊重都換不到，怎不令人心灰意冷？」
阿姐前日又在微博批評主辦商沒足夠時間供她綵排，她為確保演出水準而自費請老師練歌，又批評大會將她和秋官預備的四套衣服減至三套，耳環、頭飾、假髮及羽扇均由藝人自置，又踩主辦商孤寒說：「一般演唱會於結束後，主辦單位都會將服裝慷慨送給藝人，但丘先生要將所有服裝都歸還他公司，若藝人喜歡某一件服裝，便要付半價向他購回。」阿姐甚至在微博公開座位表，力求爭番啖氣。
郵輪雲頂騷同泡湯
據悉丘亞葵對阿姐言行極度不滿，原定明年為她在紅館舉行的粵劇騷，已決定拉倒不再合作。日前丘亞葵在電話中說：「今次分飛問題我問心無愧，絕對冇厚此薄彼，亦唔介意公開座位表畀大家睇。不過今次之後我相信唔會再同佢合作，原本出年我同佢喺紅館做粵劇，李居明都有份投資，呢次事件之後李居明問我：『係咪好難頂？係就唔好搞，搵啲易搞嘅人做囉！』」
丘亞葵續說：「其實除咗粵劇之外，雙魚星號嗰邊都有搵過我傾，想下個月20號同21號搵阿姐同秋官去雲頂做，但家都係算數。不過，之前簽咗6月佢同秋官去新加坡做嗰場就照做。」據悉阿姐的粵劇酬金約30多萬一場，而登台做騷每場約20萬，原本丘亞葵打算為阿姐開起碼兩場粵劇，現在丘亞葵被阿姐鬧走，保守估計阿姐損失逾百萬進賬。
家英：唔搞咪唔搞
對於丘亞葵放棄為阿姐在紅館舉行粵劇一事，阿姐卻否認曾跟他斟洽粵劇，她昨日在電話中說：「從來都冇呢件事。」阿姐丈夫羅家英昨日在電話中也表示不知情，他說：「我聽唔到喎！」有指李居明曾派人跟家英哥就紅館粵劇演出開會，對此家英哥說：「咁關Vigo（丘亞葵）乜嘢事啫？佢對粵劇又唔係好熟，如果要搞使乜佢搞，李居明可以直接同我傾o架。我冇聽過呢樣嘢，唔搞咪唔搞囉，做得嗰一台半台，又唔係等乜嘢，有乜所謂啫，大家開心咪合作，唔開心咪唔合作囉，又唔係做咗會發達。」
採訪：林妃