環球金融市場普遍出現向上趨勢，股、金、油及商品價格都向好，背後概念大致一樣──通脹預期。
通脹憂慮過去一段時間已被炒作，喺日本地震、海嘯同核危機催化之下，通脹概念大為加強，已經唔係純炒作，可以預期，以物業同金融資產抵抗通脹嘅活動會越嚟越普遍。
內銀股強勢料會持續，地產股之後會跟上，而下一輪推高大市嘅應該係滙控（005）。
滙控C輪29825：滙控收報84.40元，跌0.88%。股價喺2月中上過90元樓上，之後反覆回落，喺250日線靠穩，重拾升軌，上禮拜五升上50日線，稍作整固應該會上試90元，可以諗吓隻C輪29825。
隻輪現價48仙，2011年8月29日到期，行使價84.05元，溢價5.3%，引伸波幅25.5%，槓桿率17.6倍（有效8.8倍），正股升上90元，29825有機見82.9仙，升幅有七成半，正股跌穿82.30元就沽咗隻輪。
俊樺