有線記者上月底在南昌公園瞓草地遭保安勸阻後，網上有人發起蒐集本港草地圖片及位置，宣揚瞓草地訊息。靈光一閃，決定邀請曾志豪和陳淑莊組成「瞓草地敢死隊」，於上周四晴朗下午瞓維園，結果竟然係任瞓無人理?!
記者：蔡俊業
攝影：周旭文、林栢鈞、陳陶鈞
有時瞓得有時不得
無呃你，超神奇，結果真係由頭到尾無人趕！話說上周四下午，我、攝影師、聯同港台節目《頭條新聞》主持曾志豪及立法會議員陳淑莊（Tanya）一行四人，浩浩蕩蕩來到維園中央草坪。當日陽光充沛，我攤開一張六人的格仔枱布當地墊，煞有介事的買了幾支果汁扮有野餐feel，好，行動正式開始。初時Tanya還是不敢全面瞓下去，只敢盤腿而坐用iPad，反而旁邊的曾志豪就有理無理先瞓為快，皆因周公急call。「未見到你哋之前我已經喺緩跑徑出面嘅木凳瞓咗陣，真係好攰，就攞個書包當枕頭，幾分鐘後就有位保安姐姐走過嚟話：『不如你都係坐番起身！』我話好攰，佢話：『可以揀啲有椅背嘅地方挨嘅！』但只係畀挨唔畀瞓，當時初步感受到呢度唔畀你瞓有幾咁嚴厲！」
咦，莫非不祥先兆？又唔係喎，剛好發現遠處有位光頭先生比我們更大膽──赤膊上陣，瞓在草上曬太陽。望着時間已經過了十分鐘，依然無人理，曾志豪初步估計是「保安睇唔到，會唔會係畀最低工資困擾緊呀?!」旁邊的Tanya見到曾志豪如此享受，說：「我反而有意外驚喜！天氣好，老實講我好少呢啲時間喺公園出現，仲可以慢行已經好感激。我覺得呢個公共空間真係好珍貴，如果其他地方都有咁上下嘅草地畀人哋瞓吓、踩吓、轆吓，成個感覺好唔同，因為康文署管轄之下，公園實在有太多嘢係No！」
其實港人唔愛瞓地
康文署禁止成性，就以維園為例，到處都有告示指出不准這樣不准那樣，當中掛在大門的12個「不准」標示尤其醒目，就算是草坪旁邊的告示板亦貼上《遊樂場地規則》，標明：「任何人不得在任何遊樂場地內步行、奔跑、站立、坐下或躺卧。」咦，奇怪在今次整個行動維持兩小時，最終都沒人理會，就連期間遇到有園內巡邏車經過，一樣沒事！事後向康文署查詢，新聞組回應：「市民可在開放的草地上作休閒活動或休息，如散步、躺卧、閒坐或遊戲等，這安排適用於康文署轄下所有休憩設施內的草地。」即是說，維園的中央草坪係可以任玩任瞓的！
且慢，既然如此，何以香港人不選擇享用草地？Tanya嘗試以個人經驗解釋，是自小受教育潛移默化，「當我20年前第一次去美國，去到見到成片草地，踩上去嗰吓我好驚，因為由細到大淨係學識『不准踐踏』，草地係唔踩得嘅，着住鞋踩就驚犯規，唔着鞋踩就驚有蟲咬！」曾志豪去過台灣墾丁鵝鑾鼻公園，也有同樣經驗，「那邊的草長得很多，但開頭我都會驚，會諗係唔係行番石仔路安全啲？但見到所有人都行，你就明白啲草生得咁多就係畀你行，我懷疑香港社會唔係好鍾意『瞓』，甚至任何非站立姿態都好抗拒，好唔得大方，難怪商場都特登唔整凳。」
市肺空氣特別好
由瞓草地這話題延伸開去，到底一個公園應該包含甚麼社會功能？熟悉城市規劃的公民黨執委會副主席黎廣德指出，按照《香港規劃標準與準則》，休憩用地可以分為「鄰舍休憩用地」及「地區休憩用地」兩種，「每個人各自應該有一平方米，即合共兩平方米嘅休憩用地，即十萬人口就要有十公頃。」他指，東區現時大約有30萬常住人口，但維園僅19公頃，連同東區其他公園，「休憩用地明顯配合唔到社會需要！」而按地區規劃的角度來說，公園的功能主要睇三個P：People、Planet與及Prosperity。People是指甚麼人可以用得到，「2000年維園經歷過一次大改建之後，有啲設施犧牲咗，例如乒乓枱無咗，但又多咗個網球場，用嘅人唔同咗，感覺上以前較為平民化。」至於Planet就是環境，黎廣德直言維園環境經過多年發展後有好有壞，仔細一點，「過去無咁多欄杆，亦無咁多完整嘅通道，自然嘅山坡較多。」宏觀一點，「八十年代之前無東區走廊，維園可以直接出去銅鑼灣避風塘，出去岸邊上船，家隔住條橋，已經完全割裂，噪音亦都多咗，空氣亦都差咗。」但他強調，維園依然能夠發揮其市肺功能，「科大過去兩年都有做一啲研究，發現港島區有一個好奇怪嘅現象，沿住軒尼詩道空氣質素最差，但一入到維園就好好多。」最後一項是Prosperity，直譯是「興旺繁榮」，主要有兩方面，「一係講公園設施可唔可以聚到人，例如小食亭、餐廳，維園比起外國公園，例如悉尼嘅TheDomain相對少，後者有啲幾靚嘅餐廳，維園就無呢類設施，我唔係主張好豪華嘅餐廳，而係吸唔吸引到任何人過嚟；第二就係講喺經濟活動之中嘅一個康復過程，因為嚟公園就係為咗舒展身心，以前維園少好多規定，五六十年代有好多人屋企無冷氣，真係會嚟呢度過夜。」
維園填海填出來
根據本地歷史專家、香港歷史博物館名譽顧問鄭寶鴻憶述，維園這片地原為維港一部份。現時大坑銅鑼灣道呈半圓的海岸線，正是英文「Causeway」的來由。對出海面就是避風塘，1880年代港英政府決定將之填平，興建高士威道，空地後來就建立皇仁書院及中華游樂會等。戰後香港大興土木，1951年港英政府再次填海，剛巧當時利希慎家族看準銅鑼灣區潛力，將利園山移平，而移平得來的山泥及建築物料就直接拿去填海，成為今日維園。鄭寶鴻指，維園本身三面環海，「以前維園道未起，一出去就係海；另一邊告士打道天橋原本係一條河，方便旁邊嘅牛奶公司冰廠畀佢運啲冰出去。」冰廠的現址就是現時的皇室堡及恆隆中心一帶。自1954年起，維園擴展至今已佔地19.3公頃，是全港第二大公園。
根據康文署數字，粗略計算公園內共3,200多棵樹，較多的為大葉榕（約180棵）、蒲葵（約160棵）及鳳凰木（約140棵）。現時合共有75名員工負責整個維園的日常管理及運作，還未計外判承辦商聘用的清潔員工及保安。單單2010/2011年度的營運開支便達到1,570多萬元，主要用作支付電費及外判清潔和保安費用。可見維持這城市巨肺，政府每年都要付上千萬元支出，認真不便宜。
