財爺曾俊華一掟六千蚊出嚟就成功轉移視線，家冇人理佢hea做預算案，反而人人走去聲討新移民，話新移民唔應該有六千蚊、內地人搶生仔床位、搶奶粉云云。向來敢於批評中共、鬧爆地產霸權嘅作家陳雲，噚日都喺facebook向新移民開火，佢話反對新移民嘅目標係要反共，因為家唔少新移民，係中共嘅平民間諜。
二奶搞破壞佔港人家產
人人怒插新移民，陳雲就話香港人反對某些新移民，唔應停留喺內地孕婦來港產子或欺騙綜援、佔住公屋嘅層次。佢話抵壘政策之前，唔少偷渡客係為咗追求自由、反對極權來港，但係家好多新移民係中共嘅平民間諜，係港共嘅投票機器，自由法治與憲政嘅蠹蟲咁話。
呢個status引起好多網民討論，至噚日有成171個回應。陳雲將話題帶到去中港姻緣之上，佢話香港人喺大陸娶老婆、包二奶、識女友，好多都有間諜身份，有啲二奶專門搞壞香港家庭，然後霸佔香港人的家產。所以「港女，縱使有千般不是，政治上是最可靠的伴侶」。「香港富豪最清楚，他們寧願考慮娶隔籬梳打埠的Isabella，也不會娶大陸女人」。八方見陳雲去得咁盡，咪問吓佢點解會有咁嘅睇法，會唔會俾人覺得歧視？陳雲就話講呢個問題，係因為貼文嘅朋友思想糊塗，又唔敢面對問題核心。至於新移民係間諜，佢話國際新聞歷年有報道，讀者可自行判斷真偽，佢唔喺報上回應啦。
同根社主席感言論奇怪
同根社主席楊媚聽到呢個新移民間諜論覺得好奇怪，佢話如果咁多新來港婦女係中共間諜，就唔使辛辛苦苦喺內地輪候超過十年先有得嚟香港一家團聚。至於新移民係港共投票機器，佢就更加唔明白，皆因新移民未住滿七年都冇得投票，如果佢哋有票喺手，就唔使爭取權益爭餐死，講親乜嘢都冇人理，賤過地底泥啦。佢話新移民喺香港經已夠晒弱勢，希望大家唔好乜都攞佢哋嚟開刀！
mailto:[email protected]