逃避美元，所有非美元資產幾可肯定會有價有市。香港人關注股市，連未知藍籌為何物的好些大專生，亦爭相問「有咩好買？」，再估恒指見二萬五、二萬六、二萬七……其實已毫無意義。
港股進入升市周期，大行亦再上演現形記。本着有斷估無痛苦之能事，預言內地暫停收緊步伐，誰不知24小時內，大行被人行搞到尷尷尬尬。
大行唱好總有理由，大行唱淡更有理由，只會學曉理據循環反轉再反轉相互左右開弓，大行報告你我均曉撰寫。例子之一，高盛去年睇好渣打集團（2888）有大堆理由，今日棄渣打投滙豐控股（005），就用回當日睇好渣打理據，繼續借題發揮，總之買又好沽又好，一箭雙鵰，做齊兩邊生意，最緊要幫襯同一間俾料你嘅大行。
內銀股估值合理可吼
24000樓上，港股未算最抵，當然亦非昂貴。信香港人民幣化，港元會由人民幣取代，其實港股最少較現價折讓一成半。況且，全人類目標已經將對抗通脹為首要任務，資金氾濫加上通脹預期，已經為股市製造再升理由。未入場買貨者，不斷想問「邊隻好？邊隻抵？」按估值，內銀的確合理，按前景，地產與收租股又有理據再升，信大行報告，滙控更屬超值兼抵到爛。
大牛市之下，大行大合唱，一間大行每日推3、5、7隻，10間加埋就總共幾十隻選擇，投資者更覺舉棋不定，最無奈係toomanystocks遇上toolittlemoney。無論名家推介、大行預測，均加入一定程度個人主觀願望元素，等於一碟小菜加入味精一樣。要買一隻不含添加成份的股份，又想收一網打盡的功能，盈富基金（2800）實屬首選。一來，盈富從無大行報告推介，二來懶理做功課的投資者亦毋須左問右問，就一次過買入45隻藍籌。信港股升，買盈富吧！
胡孟青
獨立股評人