為了證實5字頭是求職障礙，蘇樹明（Pico）試過在履歷上報細數。原來57歲的他只要報細10歲，真的會被僱主看上，那管其餘一切條件不變。「你話香港點會冇年齡歧視？」Pico最終放棄那99.9%石沉大海求職信中的唯一應徵機會，因為他知道一露真身便打回原形。Pico禁不住嘆道：「其實我哋一啲都唔輸蝕畀後生仔，點解唔畀個機會我哋？」
讀再培訓班無助搵工
老實說，眼前的Pico頂多像50出頭而不似年近60，可惜年輕的長相不會「加分」，人事部着眼的只是一組數字，「佢哋會將求職者用年齡分類：30歲一叠，40歲又一叠；50歲呀？擺埋一邊啦」。
Pico原在一間玩具廠任職採購經理，08年金融海嘯，他淪為失業大軍，被裁原因無非因為年紀較大而且人工較高，「其實當時我都係54歲」。要給家用又要供樓，Pico徬徨之際仍努力搵工，幾個月內發出逾百封求職信，「我已經將人工係咁下調，去到一萬蚊都冇回音」。
諷刺是他曾有一個疑似獲聘機會──某次他漏了遞交履歷，單單一封求職信卻已獲該企業要員回覆，表明有意聘用，要求補交履歷，「交咗履歷之後反而冇消息，因為佢哋知道我幾多歲」。
最無助的時候，他「誤信」政府，報讀僱員再培訓局的點心製作班，自以為轉營做點心師傅未嘗不是一條出路。畢業後卻發現，「勞工處幫手搵嘅工請嚟請去都係保安、陪月、家務助理等，我讀點心班嚟有乜用？」Pico頓一頓續說：「噢，都有嘅，嗰時冇嘢做喺屋企，咪試吓整啲點心畀自己食囉。」
一年半前，頭上烏雲密佈的Pico漫無目的在街上蹓躂，「嗰時down到車都唔搭，由深水埗行去油麻地」。「頭岳岳」瞥見橫額上有一列大字：「友待長者就業計劃」。他絕不認老，只是被「55歲或以上人士」字眼吸引，走進香港耆康老人福利會報名成為「學生」，「其實啲課程內容（如何與員工相處、如何確立個人形象以及資訊科技應用等）我都識晒，就係貪讀完之後有轉介，再有工做嘅機會大好多」。
本周四長者就業博覽
Pico完成課程後旋即獲一間汽車會聘任為兼職秘書，目前仍然繼續以「搵長工」為目標。他不為57歲的年齡自卑，反而覺得有自豪之處：「其實年紀大嘅人，無論學識、經驗、責任感同待人接物方面，完全唔會輸蝕畀後生仔，我哋稍欠嘅只係體力啫，年齡絕對唔係負資產。」
像Pico一樣有心有力的人才仍然很多，但不少人都在60歲法定退休年齡後被迫在職場上消失，一直鼓勵長者再就業的香港耆康老人福利會本周四（本月14日）在將軍澳東港城舉辦「長者就業博覽」，專為50歲或以上人士搵工，至少16間企業參加博覽，提供逾300個職位。Pico呼籲同齡人到場碰運氣，「有工做，自信心都返番晒嚟」。
記者 許偉賢