【第30屆金像獎之女主角篇】世上只有懶的女人，沒有不爭的女人，對於獎項更無不爭的道理。
相對今屆電影金像獎乏善足陳的男主角提名，影后誰屬更引人入勝。先有挾電影評論學會影后名銜衝擊金像獎的楊千嬅；又有出錢出力，自言是黑馬的何超儀以西班牙影后之名出擊；再來是在銀幕做回自己的越南影后薛凱琪。單看牌頭，三地影后爭一個獎鬥個你死我活，肯定好睇過歐冠盃次回合的幾場例行公事。 撰文：魯萍、溫敏芝
超儀：等咗好耐 提名電影：《維多利亞壹號》
36歲的何超儀挾西班牙錫切斯影后殊榮，挑戰今屆金像獎影后，她說：「我係黑馬，如果輸畀劉嘉玲，我會好甘心，唔好只睇武則天演技，嘉玲演藝生涯咁多年，有過咁多精采演繹，火候十足。」但超儀內心矛盾，她說：「信心係有，但唔多，我覺得呢部戲太另類，有人好鍾意，有人唔鍾意，好似冇中間。公佈名單當日自己都唔敢相信，覺得自己未夠紅，就係覺得未輪到我。」
煲碟知己知彼
知己知彼，超儀即時買來勁敵的影碟分析勝算，得出的結論是「冇人輸」，她說：「劉嘉玲個勢係佢先有，武則天行出嚟幾有霸氣，邊個做得到，香港冇。」視嘉玲為最強對手？她說：「唔好用強，好驚得罪人，個個都好平均。」她續說：「最唔同嘅對手會係湯唯，佢學過演戲，感覺好唔同，我哋嘅演技係用知識經驗累積返嚟，湯唯就兩者都有。至於千嬅，收起大笑姑婆，大家睇到佢另一面嘅美麗。薛凱琪就演得好free。」
超儀不諱言：「我梗係恨拎最佳女主角，等咗好耐，仲係自己製造機會，對我嚟講，香港金像獎比西班牙影后意義更大，最主要係我去到外國，人哋真係欣賞我，焦點只有電影，唔似得喺香港有其他雜念。」
髮型：SamPangofHairCulture
化妝：嫻仔
服裝：HarveyNichols
千嬅：提名心足 提名電影：《志明與春嬌》
現年37歲的楊千嬅經歷過無數次在台下等待公佈樂壇最受歡迎女歌星獎的心情，但當首次坐在台下與四位女演員爭奪香港電影金像獎最佳女主角，心情截然不同，千嬅日前坦言：「我參加新秀時，諗都冇諗過家可以坐喺劉嘉玲身邊一齊提名女主角，已經係好大進步，好有滿足感。」
「好鍾意愛嘅感覺」
面對幾位勁敵，早前憑《抱抱俏佳人》在香港電影評論學會封后的千嬅，對今次入選不敢抱太大期望，她說：「娛樂圈，好戲嘅、默默耕耘嘅好多，真心講有得入圍已經好開心，每次提名都開心，唔係虛偽，開心嘅係作為歌手有人認同自己演員身份，音樂以外，有人睇到我做戲，最想得到係演出機會。」
跟資歷最深的劉嘉玲比較，千嬅輕描淡寫說：「冇理由用春嬌去同古裝比，其他幾位嘅演出都好好睇，我會用學習角度去睇唔同事物，觀摩別人唔同心態。」相對薛凱琪的角色，千嬅自言已過了那段年齡心態；超儀跟嘉玲的角色則需要很大功力，她續說：「嘉玲姐演一個歷史人物，佢嘅角色有霸氣但冇猙獰面目；何超儀又係另一種演出方法，睇到佢同導演之間幾有默契。湯唯，估唔到佢明白港女係乜，完全捉到節奏。Fiona比《早熟》更成熟，好唔同以前，好特別。」
不過，就算別的角色有多好，千嬅仍是最愛《志明與春嬌》中的春嬌，她說：「原來我好鍾意拍拖，睇亦舒愛情小說已好鍾意愛嘅感覺，有場戲講我約咗余文樂喺後巷見，等極佢都唔見，之後去到大本營見到佢，我即刻黑面扯完兩啖煙就發脾氣，女人以為男人應該明白，男人認為女人唔識體諒，鍾意一個人會發埋啲無聊脾氣，好細微但又好到位。」
髮型：VicKwanofHairCulture
化妝：LingChanofZingTheMakeUpSchool
服裝：APC 首飾：Piaget
薛凱琪越級挑戰 提名電影：《分手說愛你》
29歲的薛凱琪（Fiona）演出愛情片《分手說愛你》令她榮登越南影后，演技備受肯定，更為她帶來金像獎最佳女主角提名，越級挑戰劉嘉玲、楊千嬅、湯唯和何超儀。
Fiona先前憑《早熟》提名金像獎最佳新演員，雖然落空，但今次再入圍金像獎，一下子升呢得到最佳女主角提名，Fiona坦言開心，她說：「我知道入圍真係好驚訝，但當時喺北京拍戲，唔能夠即刻同屋企人分享，幾位入圍者中，我係年資最少一個，可以提名已經係好大鼓勵，唔會有壓力，如果我真係攞到獎真係bonus。」
與祖名有默契
Fiona憑《分》片躍升越南影后，她表示不會增強信心，她說：「越南影后同金像獎影后係兩樣嘢，每個地方評審準則唔同，唔會因為越南影后影響個賽果。」她也不覺自己升呢，入行六年多，其實資歷也不算深，她表示有看過千嬅和湯唯提名的電影。問看好誰？Fiona說：「每個都大機會過我，我係最新一個，覺得千嬅機會大好多，今次係佢突破嘅演出。」
至於湯唯的《月滿軒尼詩》，Fiona感覺她有種很獨特味道，她說：「我相信係種演技，唔係自然發揮出嚟，係深思熟慮過。」
提到《分手說愛你》拍檔房祖名，Fiona坦言與祖名早有默契，問她在戲內與祖名猶如真情侶，她笑說：「咁咪係演得好囉。」
髮型：JoLamofStage
化妝：JessicaChan
最佳女主角提名
薛凱琪《分手說愛你》
湯唯《月滿軒尼詩》
楊千嬅《志明與春嬌》
劉嘉玲《狄仁傑之通天帝國》（左圖）
何超儀《維多利亞壹號》
資料來源：香港電影金像獎
