睇過《SinCity》或《索女．喪屍．機關槍》，一定會記得鬼才導演羅拔洛迪古斯！最近因玩嘢而真係拍成電影嘅《攞命、彎刀、罪惡城》終於出碟，雖然香港戲院無得上，但今勻可以喺屋企盡情睇吓呢套Cult片，一於熄燈、開機、「焚」爆機！
記者：王震遠
黑工復仇 黑吃黑
鍾意睇Cult，唔止貪佢夠重口味，仲有奇幻劇情先夠煞食！先講古仔，過氣墨西哥探員彎刀（Machete）淪落到美國德州做無證黑工，無端端被人揀中去刺殺一個大力打擊墨西哥偷渡客嘅參議員，點知準備開槍之際，先發現被人擺上枱，原來參議員想扮中槍、博同情拉選票；淪為過街老鼠兼通緝犯嘅彎刀決定要報仇！
粗粒扮懷舊
套戲背後原來有段小插曲，話說兩大導──羅拔洛迪古斯同昆頓塔倫天奴合作拍Grindhouse（包括《索女．喪屍．機關槍》同《玩命．飛車．殺人狂》），諗住玩吓嘢開拍兩段假預告片，點知其中一段《Machete》被網友勁讚，人人以為真有其事，於事羅拔洛迪古斯索性弄假成真，變成呢套《攞》。
刀鋒入耳
話明Cult片，血腥暴力當然唔少得，由頭打到尾，勁多駁火槍戰位，《攞》真係啱晒用嚟試吓套音響有幾利。「大劈佬」主角一定好打就走唔甩，唔知點解佢有槍唔用，硬係鍾意揸把開山刀左劈右劈，殺人手法仲要係刀刀封喉！每斬一刀都聽得出好似磨刀咁利嘅尖音逼到埋身，壓迫感同金屬感一流；如果你耳仔夠利，仲會聽到經Tune輕咗嘅小噴泉血聲埋尾，直情用對耳都聽得出啲血點飛出嚟！
Profile
《攞命、彎刀、罪惡城》
字幕：英文、繁體中文
音效：DolbyDigital5.1
推出日期：4月8日
售價：$249 （BD）$139 （DVD）$55 （VCD）