永保林業（723）連日本投資大師邱永漢都點名力薦，魅力非凡，要買。永保主打林木業，繼大孖沙新創建（659）上年入股，啱上個月尾，投資大師邱永漢就力薦永保，兼計劃本月嚟香港，進一步了解呢家企業，對永保重視程度，唔使多講。查實此無他，永保經營嘅，全部都係現成成熟木林，唔需要等，已經可以開伐賺大錢。再加埋集團引入多個伐木商，更加相互間競爭，永保成本大降，毛利就更加啖啖肉。永保轉型林木業以嚟第一個半年度（2010年9月底止），已經虧轉盈1.8億銀。就當2011年全年度純利起個孖到3.6億銀，連攤薄效應計，預期PE都係得4倍幾，吸引到痹。買永保，博翻一番到1.06元，集團預期PE，仲未上到雙位數。
丹楓現價博翻半番
丹楓（271）最新NAV每股2.58元，現價0.84元，折讓67.4%。集團本身揸住尖嘴港晶中心，應佔建築面積11萬平方呎，加埋集團透過聯營揸住嘅大潭紅山半島物業，資產優質，呢個NAV實淨到爆。就排除丹楓及安寧（128）有得炒同氣連枝因素，單係博磚頭落後，丹楓NAV折讓收窄到50%，價見1.29元，現價講緊翻半番。
錢雋