近來香港報紙及電台烽煙節目以至立法會充滿「不公」、「不平」、「不公義」、「霸權」、「勾結」、「無良僱主」、「暴利」呢啲字眼，睇得多，聽得多，呢類充滿控訴、寃屈、憤激等情緒嘅字眼，變成老生常談，濫用到了無意義，只不過係二十幾年前，我地話人「黐線」，係一個嚴重罵人、撩交打嘅字眼，有教養嘅媽咪一定唔俾仔女講，但時至今日，人人都講：「你黐o架」？自己有時會高聲大嗌一句：「我黐咗呀」。阿媽會鬧仔女：「黐線」，成個香港都黐黐哋啦。左丁山就成日俾老婆仔女贈一句：「你今日黐咗咩！」以此推算，甚麼「霸權」、「勾結」、「無良」、「不公義」等等字眼，好快就冇晒內涵，成為社會常用語，以後罵人無良唔會再先而口角，繼而動武。
今年九月教科書調整價格，引起不少黐黐哋嘅反應，一啲記者，一啲社論寫手就屬此類，譬如話教科書市場一年有十五億元「巨大利益」。其實十五億只係估計嘅教科書市場，有估計近三成學生用舊書，實際市場規模係十一億至十二億元之間。但市場不等於利潤，超市做十五億生意，不是賺到十五億，只會賺到五至六千萬元。利豐（494）業績顯示，生意額超過千二億，純利只有四十三億。賣書十二億，純利有多少，一位老牌書商，子承父業，去年話要賣盤，話純利頂多得幾個巴仙。所以佢對書商巨大利益之說，嗤之以鼻，係「細路哥記者無經驗之言」。可惜，老啲嘅編輯都同樣係黐黐哋呢。
左丁山係寫稿佬，最憎人地話稿費唔駛高，一啲幾黐嘅言論就係「教科書不要彩色粉紙精印，不要在酒店搞傾銷會，不要送禮，不要贊助學校運動會……就可以減價。」呢類成本，只係overheads，與最重要嘅教科書研發經費無關，讀書人或係資深老師或係博士教授，寫一本書用兩年，加幾個編輯服務，幾個兼職大學生做資料搜集，再加IT專家將內容數碼化、電腦化，呢啲稿費、薪水，唔值錢呀？人腦資本唔駛錢呀？做乜講成本只係識講紙張印刷，唔講作者嘅心血？如果請張五常寫本教科書，成本點計？呢類研發成本好難機械式咁分拆為課本、教材、課材三部份，教育高官如非黐黐哋，應該知道啩。