八方幾乎日日俾人追交稿，估唔到我個老闆肥佬黎都有俾人追到氣咳嘅時候。肥佬黎近日粉墨登場拍咗個廣告，製作單位搵咗70幾個臨記到場，導演一聲令下全人類追住肥佬黎，嚇到肥佬黎即刻掉頭走難咁走。
呢段片只係上集，下集本月中曝光，屆時就知肥佬黎葫蘆裏賣乜嘢藥。肥佬黎做男主角拍廣告七情上面，八方聽聞鏡頭以外，佢嘅表現仲精采。話說拍攝現場係一條倔頭巷，有個鬼仔街坊對忽然出現成百人嚟到拍廣告，擾佢清靜好有意見，玩鬥氣坐在路中心睇書，無聲抗議。
由於呢位街坊妨礙拍攝，肥佬黎見狀上前與佢理論，目擊者稱期間聽到高分貝F字詞語，部份圍觀者初時仲以為係廣告劇情一部份，你話肥佬黎係咪好戲呢！