英皇書院被強制減班，激起校友不滿，英皇同學會以會長林超英名義，今日喺報章刊登致特首公開信，要求政府「糾正」錯誤減班令，並再次指教育局局長孫公將自願變強制，冇晒誠信，煲呔再唔炒佢，就有違中央人民政府對煲呔嘅重託同寄望。
公開信指開五班中一嘅官中有16間，但減班只有15間，質疑教育局點解放過收南亞裔學生為主嘅官立嘉道理爵士中學。又話一直受家長歡迎嘅22間傳統名校，只有九龍華仁書院參加減班，證明辦學團體都會保留旗下優秀學校，更何況九華最終都撤回申請。
早前九華一班叠水校友亦登報反對母校減班，將件事揚開晒，英皇校友呢次結果係點未知，但登廣告要錢，呢封公開信至少證明佢哋有銀彈，挑戰政府提出司法覆核，絕對唔係得把口鬥噏。