貓就話有九條命啫，估唔到羅樂林都有六條命，不過無綫竟然喺短短24小時內攞走佢五條命，真係冇陰功。
63歲嘅羅樂林最近紅過晒無綫所有小生，由朝到晚有《布衣神相》、《洪武三十二》、《女拳》、《誰家灶頭無煙火》，仲有重播嘅《皆大歡喜》同《七號差館》六部劇出街。點知佢喺《洪》劇演嘅朱元璋同《女拳》嘅莫平大前晚（6號）先後死去之後，有網民發現佢7號喺《七》劇嘅孫全、《布》劇嘅無相子同《皆》劇嘅金華亦全部死亡，邪到冇人有之餘，相信羅樂林亦都創下電視史上一個紀錄。
網民立碑
噚日羅樂林喺電話度話：「我諗住一晚死兩次啫，點知啲網民咁犀利，有幾部劇拍完好耐，個角色我都唔記得。個女睇到好唔開心，話網民同我立碑，但我覺得人哋冇惡意嘅。」馮仁昭問羅樂林會唔會覺得大吉利是？佢笑住話：「我拍戲一向百無禁忌，由邵氏到家40年，我大大話話死過100次。TVB唔係特登，呢啲夾都夾唔到，我冇唔開心，反而覺得幾好笑，呢個紀錄相信都冇人破到。」佢話每次拍要死嘅戲，無綫都有畀利是，又話：「死晒o架啦，跟住落嚟嘅角色全部都係正能量。」