最低工資生效在即，當年企出嚟唱反調嘅自由黨張宇人被封為「廿蚊張」之後，一直低調免得再做箭靶，八方收到風，佢終於有接班人，自由黨計劃下星期舉行一個最低工資苦主申訴大會，由該黨嘅中小企關注組召集人鍾國斌擔大旗。
老闆同打工仔可參與
自由黨中人稱由於近日好多小商人，甚至打工仔向佢哋求助，話憂慮最低工資生效後飯碗不保，又驚計錯人工俾人控告，有個茶餐廳老闆更話：「原來張宇人真係冇呃人！」有見及此，自由黨決定揭竿搞呢個大會，自認為受害嘅老闆可以到場，覺得受累嘅打工仔亦歡迎參加，預計有百幾人出席，地點容後公佈。
「廿蚊張」風波損害自由黨形象，近日更要轉用新黨徽洗底，轉個頭又觸碰最低工資呢個咁敏感嘅議題，據講黨主席劉健儀不以為然，不過副主席周梁淑怡認為自由黨作為工商黨，應該立場鮮明維護工商界利益，支持搞呢個申訴大會，最重要係鍾國斌唔怕做箭豬。