中環政府總部風水可能真係有問題，商務及經濟發展局話唔定真係有衰氣，否則點會連續兩任局長都因病辭職？八方並唔係迷信，只係近日無數中環人都有此疑問，正所謂寧可信其有，使唔使搵個高人去睇睇呀！
恐嚇事件「過咗就算」
劉吳惠蘭局長辭職醫病，八方祝佢早日康復，而同佢交手多個回合、有牙齒印嘅旅遊界議員謝偉俊，噚日就同八方講，聽到局長因病辭職消息都戥佢難過，又話由於忙住開會，一直未有時間慰問局長，「適當時候會問候佢」。
今年2月農曆年期間立法會擺春茗宴請官員，事後謝偉俊稱席間與局長談及規管本地旅遊業措施時，劉吳惠蘭警告佢要「小心政治前途」，謝偉俊回敬一句「andyours」。謝偉俊質疑官員政治恐嚇，要求局長道歉及對質，劉吳惠蘭否認，而且拒絕公開辯論。
噚日重提此事，謝偉俊話「小事一宗，過咗就算」。呢單風波源於商務及經濟發展局與旅議會推動改革，引入規管旅遊業嘅嚴打10式對付本地導遊「刀手」，辣招形同將「刀手」廢武功，難再劏客搵食，代表業界利益嘅謝偉俊對呢位曾講過逢商必奸嘅「刀手剋星」工作評價係「稱職」，「劉局長需要多啲時間去應變，遇到突發嘅事，對佢係考驗。」
謝偉俊又話想唔起劉吳惠蘭任內有何建樹，「佢喺壓力下做嘅反應同決定，有時過敏或者過激，令人覺得唔夠硬淨去捍衞旅遊業界利益，我有啲遺憾」。人在江湖各為其主，謝偉俊作為業界代表，八方覺得佢嘅表現都好稱職。
感壓力大 冇以前咁fit
高官政客工作多，健康亮起紅燈可能不自知，謝偉俊話自己年年驗身，慶幸無大病暗病，身體狀況正常，不過做議員後覺得自己狀態冇以前咁fit，可能係因為壓力大，尤其係面對好大爭議性嘅議題表決時，好似高鐵撥款同政改方案投票時，「呢啲事鬥爭好激烈，社會嘅壓力真係非同小可」。減壓唔係冇辦法嘅，第日聽民意投票咪輕鬆晒囉。