港交所（388）今年3月7日開始推行延長交易時間，提早半小時開市、午休縮短半小時，實施一個月以嚟，受影響嘅金融、公關同飲食界有咩反應？華華走訪一個月前訪問過嘅界別，發現部份證券業人士嘅怨氣依然濃烈，投訴聲音不絕，指加時同生意增加無直接關係；個別高檔食肆嘅午市生意額，更明顯減少，但晚市就變得旺場；茶餐廳同公關，影響就唔係咁大。總括嚟講，市場仍然需要一段時間去適應加時，為下年3月午休縮短至1個鐘做好準備。
證券行包伙食 補償員工「加辛」
總部喺中環中心嘅日發證券，體恤經紀同後勤同事食晏時間緊迫，上個月港交所（388）實行加時，就開始出錢幫同事叫飯，即係「包伙食」。行政總裁鄭暐霖表示，「包伙食」措施反應理想，實行一個月，有過半數同事參與；但就唔覺生意額因加時而增加。
加時同生意 無直接關係
鄭暐霖話，近日港股成交轉趨暢旺，生意可能多咗，但就唔覺同加時有直接關係，「買股唔同行街買嘢，通常你諗住買幾多就幾多，唔會行耐啲就買多啲。」另外，上個月A股波動唔算大，暫時睇唔到港股同A股交易時間重叠，係咪可以減少港股開市時被挾上挾落嘅機會，呢樣嘢需時觀察。
返工時間長咗，同事自然會呻兩句，日發證券為同事「包伙食」，作為員工福利，希望同事開心啲。鄭暐霖話，家每日約有30位同事參與，自己都有份，以每位26蚊計，證券行一個月多1.6萬蚊使費，價錢合理，日發「包伙食」都算係為同事做啲嘢！
沈大師爆業界 醞釀推翻政策
加時翌日，本報有篇《追蹤沈大師的一天》嘅報道，當時已經有怨言嘅大師，過咗一個月怨氣仲大咗。大師話，加時之後好多時間浪費咗，好似上晝11點半到12點，同埋下晝開市10分鐘之後，個市都冇方向，「加時只係將個波幅拉長，但就令到我哋越嚟越辛苦！」佢仲講到業界正在醞釀推翻個政策咁激㖭。
業績同報告都睇唔切
講到辛苦處，大師就一輪嘴咁呻到樹葉都落：「好似lunch食早咗，有時根本未餓；出業績、報告睇唔切；同上市公司食飯，就趕到連問條問題都唔夠時間，餐飯就食極都食唔完。」好在大師EQ夠高又捱得，適應上當然唔成問題，但佢覺得成件事唔合理，好鬼㷫囉！
佢仲偷偷哋同華華講，以前證券界各家自掃門前雪，但呢單嘢搞到業界，甚至公關、窩輪商、炒家都一面倒有怨氣，而且已經有「積極嘅人發起緊力量」，勢要推倒港交所呢個一意孤行嘅政策。照咁睇，缸湖似乎醞釀緊一場風雨。
茶餐廳樂香園 熟客轉叫外賣
華華早幾日，喺中環人食晏同下午茶時蛇一蛇嘅「蛇竇」樂香園，碰見老闆鄺悅勝睇舖，順便問吓延長交易時間一個月對佢哋有咩影響？「同以前差唔多啦，總之幫襯開嘅都仍然繼續幫襯。」
只係港股早咗開市，「以前有啲熟客會坐低嘆杯我哋嘅奶茶、咖啡先返工，家有部份會話太忙、趕時間，要叫外賣走嘞。」好彩呢個情況只係佔少部份，餐廳只係間唔中接到大額外賣單，主要叫招牌蛋撻、奶茶同咖啡咁，「都係送去四季、恒生總行咁，又應該唔關延長交易時間事。」
靚湯工房續抓商機
一心搶延長交易時間呢個商機嘅網上外賣店「靚湯工房」，負責人Tony話頭一星期都多咗定單，跟住已經無以為繼，但佢哋唔會放棄呢個機會，「總之會盡力谷生意」。
國金軒午市淡 反而晚市旺咗
中環國金軒經理陳若愚原本預期，港交所（388）延長交易時間對午市生意帶來嘅影響有限，甚至可以做多輪生意，點知過咗一個月，佢發現第二輪生意唔多，整體午市生意額跌咗一成，每日午市平均做5萬蚊生意左右。
趕唔切食晏 轉為食晚飯
陳若愚話，加時之後，金融界食客通常12點就到，食一個半鐘頭，一點半前就走；即使係老闆級嘅熟客，都係早啲嚟早啲走，趕住返去睇住個市。佢原本預期，做完12點至一點半呢批金融客，可以做多輪非金融客，點知事與願違，呢類客比預期少30%，整體午市生意額跌咗一成。
好彩，金融界食客趕唔切食晏聚會，就轉咗去食晚飯，令到國金軒晚市反而做多咗生意。
陳若愚透露，之前晚市平均每月做11萬蚊生意，上個月就增加10%至15%。拉下補上之後，成個月嘅生意額都可以持平。佢估計，未來一段時間，呢個情況都會持續。
公關搞推介會 竟然唔趕時間
偉達公關每年替唔少上市公司或者準備上市嘅公司，安排投資者推介午宴，延長交易時間令推介午宴時間變得緊迫。
芬佬同分析員 照坐到兩點
偉達財經傳訊總經理（大中華區）陳嘉寶坦言，原本預期去推介午宴嘅基金經理同分析員，會趕住嚟趕住走，但最近搞過兩場推介午宴，發現情況同以往冇咩分別。
陳嘉寶話，以往搞推介午宴，通常係12點45分至一點鐘開始，兩點鐘完，最近幫遠東宏信（3360）搞上市推介，又幫平保（2318）搞業績推介，雖然港股12點收市，但啲基金經理同分析員都係12點45分先到齊，都係呢個鐘數先開波。佢哋又冇話一點半港股開市前趕住走，大部份人都會坐到完場先走，睇嚟都唔係好趕喎。
李華華
mailto:[email protected]