葡萄牙政府要求歐盟援助，反映歐洲由金融海嘯衍生嘅債務危機距離真正解決仲好遠，估計援助方案金額高達700至900億歐元，連同之前一直喺市場存在嘅全球救市資金同日本政府向市場注入嘅錢，資金氾濫情況喺一段長時間內難以改變。
區內股市噚日對利淡消息冇反應，顯示股市短線傾向推上，恒指微跌3點，報收24281，仍然係伺機推向25000關。
中石化C輪29093：中石化（386）報收8.14元，升1.5%。股價喺100日線拉鋸，呢兩日見異動，升破50日線同保歷加通道頂，走勢好靚，成交又增加配合升勢，料會炒上8.80元，可以諗吓隻C輪29093。
隻輪現價40仙，2011年8月29日到期，行使價8.80元，溢價13%，引伸波幅34.7%，槓桿率20.4倍（有效7.6倍），正股升上8.80元，29093有機會見71.4仙，正股跌穿7.90元就沽咗隻輪。
俊樺