香港目前有三大政治議題，掀起政界、商界、工會大戰，情況緊湊。第一件係最低工資，已成定局，五月一日實施，但係勞資雙方為咗飯鐘錢與計薪假日爭論不休，大傷感情，香港本來盛行月薪制，與美國英國的週薪制不同，但香港之最低工資搞到非驢非馬，月薪精神已受破壞，以後是禍是福，難以預料。親戚B間工廠老闆好好人，有良心，已一早跟隨政府行每週五天工作制，但有咗最低工資之後，計埋每週兩天假日工資，點算好？親戚B睇完成本勞工處指引，仍然一嚿雲，於是打電話去勞工處熱線查問，接聽電話之人唔識答，一味話：「睇指引啦！」講咗十五分鐘，親戚B忍唔住對住電話大嗌：「勞工處指引冇講每星期工作五日呀！」大概勞工處都諗唔到香港有咁好嘅工廠老闆嘅！
第二及第三大議題就係競爭法與全民退休保障。經最低工資一役，魔鬼真的隱藏在細節裏，競爭法想在立法會蒙混過關，商界就真係抵死有餘；至於全民保障咯喎，泛民仲係得個講字，未有實質，但社工學助理教授黃洪與經濟學教授雷鼎鳴已分別在同一日（四月四日）在「明報」及「信報」提出不同意見，黃洪贊成力推，雷鼎鳴就話絕不可行，黃洪等人初步提議之「全民退休保障方案」，在雷教授眼中根本是經不起「嚴格推敲的低智方案」！
不比「全民保障」，「競爭法」已在立法會審議，逼在眼前，非認真討論不可。獅子山學會行政總監王弼與消委會研究及商營手法事務部總主任熊天祐博士就在電台辯論競爭法，相持不下，原來王弼在港大讀碩士時，修過一科競爭法，老師就是熊天祐，兩人有師徒關係，但徒弟拼命反對，老師引外國例子支持，互不相讓。熊天祐話美孚石油經理（王建豪）與中石油經理（黎迪芳）俾人影到相，一齊在餐廳（好似在食麪），表面上已構成互謀定價嫌疑，他日有咗競爭法，此兩人會受調查！披露張相片嘅係貨運業人士，但貨運業商會曾出過廣告呼籲同業加價，又係要受競爭法之調查嘅啫，他日識競爭法嘅律師，開心咯，生意多到做唔切。