鍾鎮濤（阿B）女友范姜日前同阿B前妻章小蕙胞妹章小婉喺麥當奴道寓所樓下發生爭執，事件驚動警方，更牽連埋阿B同章小蕙嘅一對仔女，不過B仔嘉浚同B女嘉晴都喺facebook內力撐「繼母」范姜。
笑晒口整頭髮
事件主角范姜連日來都冇乜動靜，噚日佢終於蒲頭，10點多就離開屋企，佢喺樓下見到記者仲任影唔嬲，佢話自己家去開會，提到B仔B女都好支持佢時，范姜即笑晒咁話：「唔講呢啲。」提到案件嘅進展，范姜亦有問有答話因為交咗畀警方處理，所以佢都唔方便多講，但係馮仁昭見佢心情輕鬆，似乎事件冇影響佢心情，之後佢就到尖沙嘴，仲上咗艘郵輪開會。
其間范姜透露女兒鍾懿前日唔舒服發燒，噚日鍾懿就如常返學，原本范姜話會接愛女放學，不過因為佢晏晝去咗中環整頭髮，整咗成三個鐘，最終都冇接鍾懿放學，但佢安排咗7人車去接愛女。