香港音響設計師　有膽識

香港音響設計師　有膽識

香港人玩音響，歐美日為王道！土炮、港產品牌已罕見，更不要提香港原產嘅音響設計專才！近期異軍突起於外國音響雜誌及網站嘅MiniWatt，其設計師Derek，原來竟是地道70後港人，仲話早在中學年代已開始「砌機」，果然有膽識！

記者：許福合
攝影：楊錦文

Derek檔案室

DerekShek：70後，電子工程碩士，在中學時代開始組裝膽機，2009年創建品牌MiniWatt，研發音響產品，有近15年以上研發經驗。

DIY膽機

他叫Derek，自創品牌MiniWatt，70後音響設計師，對於音樂，自小就有追求完美傾向；中學時代，已膽粗粗跑到鴨記買料自己砌機：「那時預算只有幾百，所以多選擇已絕版嘅材料DIY！」咪以為Derek玩玩吓，他的DIY作品，音色絕對係「物超所值」。打定主意在這方向發展的Derek，其後開始音頻產品的開發，如DAC、揚聲器及音頻放大器，不過令佢成功上位嘅，係發燒友愛極嘅膽機！

■自創品牌MiniWatt，主要研發音響產品為主。

S1最小最輕

真空管放大器，亦即係俗稱嘅膽機，係Derek重點發展產品，不過，香港巿場細兼窄，新品牌較難進入，所以首款作品S1，主要在歐美巿場出售。S1特色係使用開關電源，比其他膽機都細，曾被評為「世界最小最輕膽機」！一年之後嘅今日，佢再推兄弟版──N3，外形大些少，但有更佳音質，而選用真空管係俄膽12AX7，同兩支美膽EL84，相比大佬S1，N3低音方面會更好，適合聽人聲音樂為主。S1及N3還有個特別設計，可直接使用100-240V電源，加上機身細，Derek就聽過：「有用家去旅行都帶埋S1，貪佢唔使用火牛。」

■第一部推出的S1，已經賣完，由N3接替。

■可直接使用100-240V電源，給不同國家地區使用。

■產品主要以歐美作銷售，外國網如CNET都有作介紹。

■$2,939（約378美金）。

■N3會跟俄膽12AX7，及兩支美膽EL84，着重低音及人聲。

玩膽機Tips

既然遇上Derek這位音響設計師，當然請教一下，玩膽機有何秘技！我最想知黑膠配膽機是不是最好呢？Derek認為：「啱聽的黑膠難找。」他自己多聽CD及數碼音樂為主，而S1及同N3在音頻方面可達到30kHz-40kHz，而人耳上限只是20kHz，所以應該好夠聽！
須留意的是真空管的選擇，Derek就建議選用NOS，有助於瞬態反映，低頻感覺更好。例如音色較全面的Telefunken，人聲悅耳的Mullard，另外Philips就屬於平均型，都有一定水準。至於發燒級玩家，Derek就建議在電源線、喇叭線及RCA線着手，優質線材在音質傳導上會有更佳表現。

■Derek說要注意線材質素及抗阻等數值，適當配搭試聽去調校音質。

■機背插頭會列有抗阻，方便配搭擴音機或喇叭。