陳鍵鋒日前接受有線訪問時，鬧爆被無綫冷待，不過昨日為外購劇《美人心計》宣傳，明顯收晒火，他坦言感激無綫11年的栽培，稍後有機會與無綫合作非戲劇的節目，更說衡量拍劇條件不是講錢，反而是機會和劇本。
陳鍵鋒昨日現身電視城與胡杏兒宣傳外購劇《美人心計》，日前鬧爆遭無綫冷待的陳鍵鋒，昨日明顯收火，問到此片是否在無綫最後播映之作，他笑說：「唔係，可能以後繼續買呢？但係外購劇嘅機會應該大啲，不過合作始終有機會，地球係圓嘛，我唔係咁計較錢，對我嚟講係睇個機會同故事好睇，我都好鍾意返嚟拍電視劇o架。」
「地球係圓嘅」
對於馬德鐘太太在微博鬧爆無綫，問到他可有同感？他說：「我冇好認真睇，我覺得每個人嘅case都唔同，我想分享嘅事已經分享咗。」笑問他有沒有人為他在微博發聲？他笑說：「微博係講自己嘢，做乜要搵人嚟鬧爆？我唔識呢啲嘢喎，某程度上我係鍾意直接講自己想講嘅嘢。」
談到樂易玲承認無綫的確是工時長人工低，不過劇集播放完有好多人認識，有助打響知名度，對此陳鍵鋒說：「其實打響咗喇，我唔係純鬧爆嘅人，之前寫啲鬧爆唔係真係我想講嘅嘢，我做cable（有線）訪問，有啲想講嘅嘢俾人刪剪咗，例如有啲係話感激TVB喺呢11年嘅栽培，冇呢11年唔會見到《美人心計》有我份。」
陳鍵鋒續說：「所以我話呢個地球係圓，去到邊度都有機會合作，有時唔一定係戲劇合作，家我哋都傾緊一啲非戲劇嘅合作，我都想快啲成事，咁我哋不和嘅謠言就不攻自破。」
杏兒拒談冇獎
此外，對於黃宗澤踢爆胡杏兒在「壹電視大獎」榜上無名而失落，杏兒說：「我唔知佢講咗啲乜嘢，你哋問番佢喇！」
採訪、攝影：何慧斯