日本核危機，搞到大家聽到日本食品都耍手擰頭。唔知係咪巧合，啱啱過咗嘅星期一，有個朋友請敏妮食飯，約咗去一家好精緻嘅日本餐廳。敏妮一入餐廳門口，就見到門前擺咗兩箱日本青森縣蘋果喺度，由於朋友同家餐廳嘅主廚頗熟，敏妮就斗膽問，「你呢啲蘋果應該唔係3個星期前到埗o架呵！」侍應即刻回答：「梗唔係啦，噚日先到。」
得悉青森縣仍有蘋果出口，敏妮既驚且喜，驚嘅係「有冇輻射o架？」至於喜嘅係災區經濟活動未致全面停頓，起碼仲有農產品出口。
惹盲目搶貨憂慮
不過，呢兩箱蘋果究竟有幾多買家垂青？要睇餐廳老闆有冇生意頭腦。隔籬版名家高明話，佢日前去Happyhour，酒吧老闆同佢講，日本啤酒仲剩番一箱存貨，供應商話冇得供應，所以飲埋就冇。就係呢句說話，高明一口氣叫咗3支。點知返到公司，名家魏力同佢講，喺超市見到大量佢飲嗰款日本啤酒。
無論樓市定股市，激發投資者盲目搶貨嘅，好可能係一個「有買趁手，唔係冇貨」嘅憂慮。
不過，係咪真係會冇貨呢？真係冇貨的話，市場有冇其他代替品？Happyhour叫多幾支啤酒事少，買股買樓追錯貨損失就事大。
溫敏妮
http://wanmanli.com/blogs/