曾經係股神畢菲特大熱接班人嘅索科爾（DavidSokol），上星期回應偷步買貨時，連股神副手芒格（CharlesMunger）都擺上枱。話說索科爾向畢菲特推介潤滑劑生產商Lubrizol前一個星期，自己先行買貨，被外界質疑呢個係佢上星期辭職嘅原因。
估唔到佢早前上CNBC解畫時，除咗繼續話自己無做錯，仲指芒格喺巴郡投資比亞迪（1211）之前亦有揸貨，擺明想借芒格過橋，為自己開脫。
芒格家族早年已持貨
不過芒格星期二就回應話，佢家族早喺巴郡入股比亞迪之前已經持貨多年，亦同股神申報咗，巴郡傾呢單刁嘅時候，自己無份參與，暗示依足規矩做事。
芒格又話，今次Lubrizol事件同佢當年投資比亞迪喺有啲相似，佢唔介意對方攞佢嚟比較，仲幫口話覺得索科爾咁做，只係一個小差錯，相信唔係故意要做啲唔道德嘅嘢。不過，佢亦補多句，話索科爾自己承認，如果有得再嚟過，做法可能會唔同，暗示索科爾嘅做法有唔妥當嘅地方。
而《華爾街日報》就爆料，喺索科爾今年1月疑似偷步買貨之前，原來巴郡舊年5月已經出咗memo，提醒啲高層，唔好投資巴郡可能有意同佢做大刁嘅上市公司，呢張memo其實過去十幾年一直存在，睇嚟索科爾真係當佢耳邊風。
聽講巴郡已經成立咗獨立委員會檢討呢宗交易，公司財務總監就話，股神會喺4月30日周年股東大會上解畫。