英國著名學校哈羅公學HarrowSchool明年到屯門辦學，如由幼稚園讀至中學畢業共十六年，需費六百萬元，據講不少內地富戶已在蛇口南山豪宅區落戶，磨拳擦掌，準備來港血拼，為子女下一代的教育，不惜腰間錢。
六百萬？用六百萬元堆砌出嚟嘅學生係唔係一定入到哈佛耶魯MIT或牛津劍橋呢？冇人敢寫包單，最多都係希望高一啲咁啫，與哈羅比較，香港啲皇仁、聖保羅，咪通通靠邊站？唉，信者得救啦！左丁山出身已執笠私校，點都係半信半疑，今日啲香港政商學界名人之中，不乏執笠私校學生，例如林煥光、黃玉山（科大副校長）、彭玉榮，皆自威靈頓中學畢業，唐偉章（理大校長），在基教書院畢業，徐立之（港大校長）來自巴富街中學（今何文田官中）亦唔係英中名校啫，鄭海泉來自福華街實用中學（今九龍工業），正是英雄不問出處。
以前講過美國天主教私校聖母大學（NotreDame）有李嘉誠大中華獎學金之設，得主可獲四年共二十萬美元獎學金，足夠完成學士課程，今年九月入學嘅申請人之中，有近二百人申請呢個獎學金，遴選委員會包括聖母大學校長、兩名教授、一名校友代表及亞洲區顧問等，先選出二十名精英中之精英，送機票畀佢地到北京參加面試，最近在北京君悅酒店舉行，據講二十名精英學生來自大陸、台灣、香港，以大陸生最多，位位嘅SAT分數近乎「爆燈」，人人做過義工、賑災等志願活動，課外活動表現優異，入到決選，梗係叻仔叻女啦，聖母大學全部錄取咗先，繼而選到三位學生得到李嘉誠大中華獎學金，又因為學生之間嘅距離極少，要「電眼」決定咁滯，聖母大學決定頒多五個助學金。左丁山知道之後，問一位知情人士：「二十人之中，位位係哈羅級數嘅學校學生呀？」知情人士話：「非也，只有一位係國際學校學生，人人講英語流利到極，能言善辯，大家都估唔到中台港之精英學生會有咁高水平！」香港有一位女生攞到二十萬美元獎學金噃，就係一位就讀跑馬地聖保祿嘅中七生，其他兩位係內地生。