航空界靚佬─國泰航空（293）前行政總裁湯彥麟（圖）噚晚坐飛機去歐洲，準備5月正式上任國際航空運輸協會（IATA）理事長兼行政總裁一職，IATA總部喺瑞士，同香港相隔十萬八千里，大家以後要再睹佢嘅風采，可能要喺IATA嘅刊物嘞。
湯彥麟3月底正式離開國泰之前，去咗美國波音飛機廠行咗一轉，幫國泰接收咗架新飛機，聽講波音方面非常有心，同湯彥麟搞咗個farewell晚宴，玩開結他嘅湯彥麟仲即席彈結他唱歌，為大家助興。佢返嚟之後，就正式同國泰講拜拜。
查實華華上個月原本有機會同湯彥麟做個臨別前嘅小圍訪問，可惜日本突然發生大地震同海嘯，導致航班情況緊張，湯彥麟不停開會指揮大局，又要飛去日本為員工打氣，每日行程都排到密密麻麻咁，呢個小圍訪問就咁告吹，而湯彥麟亦都無聲無息咁飛走咗喇！