南華周日喺榜首戰輸咗畀傑志後，爭5連冠形勢相當被動，大軍噚日提早復操準備下周三主場對東賓高場亞協盃。我求大俠噚日都有去跑馬地睇操練，見到班少林兵已收拾輸波心情，正副選喺練波時仲有講有笑。
南華足主羅傑承噚日凌晨喺球隊部落透露，過去幾季幫南華立過唔少功嘅史高斯，自1月開始養傷，其間曾返巴西接受治療，點知返港無耐又傷過；早前再做磁力共振，隨即將份報告送去巴西俾專科醫生睇，醫生睇完份報告，就叫佢嗱嗱聲返去再做檢查，睇吓使唔使做手術，挽救佢嘅足球事業。
足主羅傑承星期一聽完愛將眼濕濕咁同佢講要返祖家醫腳時，即刻應承咗放佢走，史高斯定咗下周日（10日）就同老婆返巴西；羅生仲會喺星期五安排班職球員同史高斯食飯farewell。中堅祖爾知道呢位同胞兼鄰居要返祖家根治右腳舊患，就同我求大俠講話有啲唔捨得，不過佢相信史高斯可以好番，再幫羅生同南華打江山。