英皇書院減班風波未解決，舊生會會長林超英㷫過火屎，指孫公講就自願，實際上就係強迫。
噚日佢又在自己個Blog「草雲居」控訴，除咗講事實，前台長又創作咗個強迫絕育嘅故事，慨嘆呢個世界有強權，冇細佬。
故事叫做「自願優化人口結構計劃」，話說古時有個國家糧產下降，國王於是推出呢個計劃，鼓勵國內男人自願絕育，減少人口防止饑荒。國王向臣民講明呢個計劃係自願嘅，結果部份匹夫顧全大局引刀成一快，但有個叫「英皇」嘅壯丁卻堅決唔肯紮炮，結果國王命令衞士即場為佢動手術，手起刀落，「英皇」跟弟弟說再見。
畫到出晒腸
有人問國王，點解「英皇」冇舉手都要被閹割呢？國王話朕有話事權，舉唔舉手都冇關係，堅稱自己冇講大話。結果呢個國家喺幾年後有外敵入侵，人民毫不抵抗，國王下台收場。呢個故事畫到出晒腸，邊個係國王，邊個係太監大家收到晒，加上英皇係男校，林超英嗰種切膚之痛，八方相信好多人理解。