中國燃氣（384）近期好事多磨，大股東劉明輝舊年底涉嫌「職務侵佔罪」被內地公安扣查，早排又話會舉行股東特別大會，罷免董事李小雲、徐鷹同劉明輝。噚日公司就被李生同徐生告上法庭，話要追番兩人嘅股份。
話說兩人因為劉明輝被公安拘留一事，喺董事會會議度並冇完全披露佢哋對事件嘅了解，所以李生同徐生先被董事會罷免主席同副主席職務，家仲要搣甩埋董事職位，咁兩人喺2004同2005年獲發嘅認股權，就凍過水。
李生兩批各500萬股，行使價0.8元同1.5元，徐生就分別有500萬股同9000萬股兩批，行使價0.8元同0.71元，噚日中燃收3.61元，家兩人想行使但公司唔肯發股份，計落兩人分別唔見成2460萬同2.68億元，梗係同你死過啦！