民以食為先，每個人都要食，所以耐唔耐都有做飲食生意嘅公司上市；不過，香港有地產霸權，生意唔易做，近年喺香港上市嘅飲食集團，大多數以內地為主要市場。
好似今日開上市記招嘅唐宮（中國）咁，唔聲唔聲又話上市，聽講聽日開始公開招股，如無意外，今個月19日掛牌。
睇番資料，原來唐宮喺內地都幾出名，名菜係「唐宮沙田乳鴿」（圖），喺內地一共以7個唔同嘅品牌，經營22家店舖，分別位於北京、上海、深圳、東莞、蘇州、杭州，其中一家品牌係「忍者居日本料理」，早排香港嘅日本食店自爆大部份食材唔係嚟自日本，唔知唐宮呢間日本料理嘅食材又會有幾多嚟自日本呢？
不過內地近年經濟增長迅速，飲食業的確好好賺，只要有品牌、有口碑，一定有可為。華華聽講唐宮只係其中一家今年會上市嘅飲食集團，反應如何，確有幾分試水作用。