坊間流傳「蘋果照妖鏡」多時，傳聞未有明星逃得過照妖鏡魔力，「醜陋的真身」會被照出。不得不讚讀者目光銳利，之不過明星是人也，非妖也，以「妖」來形容他們實在過火了。但有一點可以肯定，照片是百分百沒PS過，呈現出來的是藝人最直率、最真實的一面。我們亦明白讀者求「真」的渴求，故從今日起，蘋果哈哈鏡面世了！大家睇完哈哈相，得啖笑也無妨。撰文、圖片搜集：趙堯
又現真身
係人都知千嬅係大笑姑婆，郁啲就擘大口喪笑，雖然已經嫁作人婦，但習慣一樣唔會改。前晚佢去《報應》首映，無端端俾人篤中笑穴。咪當讀者係牙醫先得o架！
墾丁含丸
Eason係玩得之人，就算感冒都一樣精力充沛。大前日，佢去台灣墾丁演出春浪音樂節，表演前啪定感冒藥先，睇佢含住粒藥想吞又唔吞個樣，就知佢唔係真係好病啫。
嚇呆鸚鵡
盛傳搭上內地富二代陳聰嘅蔡慧敏，噚日着住條超低胸裙喺首映禮大搖大擺，又捉住隻鸚鵡作狀錫錫，chok到連嘴都歪埋，嚇到隻鸚鵡望都唔敢望，個樣仲好唔情願咁噃！
夢夢撚雀
又係玩雀出事啦！戴夢夢明明驚咗隻鸚鵡，又硬係要捉住佢嚟影相博見報，都唔知邊個驚邊個。不過又俾夢夢博到喎，勁！
烚熟笑容
為配合電影《喜羊羊與灰太狼3》宣傳，徐子珊前晚都算唔話得，特登嚟個喜羊羊招牌嘅烚熟笑容，依起棚牙咪住高潮眼，搞到連牙肉都翻晒出嚟，同佢一身性感打扮完全唔搭調。
瞇眼演講
校長噚日去紅館開騷，講起阿B壇嘢，就雙手拍拍、瞇眼兼O晒嘴咁款，呢個係「唔使講嘢，有眼見」嘅意思。
凸眼海龜
森美喺動畫《森美海底歷險》度聲演海龜啫，估唔到噚日宣傳嗰陣仲扮埋一份。你睇佢嗡起個鼻凸晒眼，成個眼袋現形，唔通呢隻龜成日掛住歷險，冇時間瞓覺？
