最近中文大學亞太研究所發展2011年三月份民望及財政預算案意見調查結果，結論係：「總括而言，三月份反映特區政府、特首及三位司長民望的各項滿意度指標，以至對政府的信任度均全面回升，這很大可能與財政司司長曾俊華大幅修訂財政預算案有關。然而……對財政司司長曾俊華的個人民望卻幫助不大，市民對其評分仍然不合格。事實上，調查也顯示，即使大幅修訂預算案並推出派錢方案，亦不能大幅提高特區政府在市民心目中的管治信心。」市民對特區政府嘅信任度，自09年11月至今，最高為30%（09年11月），最低為11年2月（23.1%），到咗三月就回升至25.4%，故此中大亞太研究所有上述結論。
政黨又點呢，左丁山歷年都投票俾民主黨，但依家睇見民主黨嘅口號與路線，有啲戥佢地擔心。據上述調查，民主黨受市民嘅支持度在2010年四月只得9.4%，落後於民建聯嘅10.7%，之後因為政改方案辯論，民主黨走妥協路線，支持度逐爬升至2010年六月嘅13%，六月二十五日政改方案通過，七月份嘅民主黨支持度高達15.8%，相反民建聯跌至9.1%，但好景不常，之後民主黨支持度改為浮沉不定，到2011年二月，仍有11.1%，力壓民建聯嘅8.1%，領先三個百分點，點知道，派錢方案一出，民主黨大力反對，同時間，民主黨支持度在三月份急跌三個百分點，得番8.1%，民建聯反而上升至8.8%，領先各個政黨。至於公民黨，喺2010年六月有10.1%高峯，今年三月已跌至5.1%，而社民連嘅高峯係2010年五月嘅4.5%，威風過一陣，到今年三月，支持度只得番0.9%，仲衰過自由黨嘅1.2%。與此同時，沒有支持任何政黨嘅香港人就升到三月份嘅歷史新高67.5%。睇政黨支持度嘅走勢，市民對政黨毫無熱情。社民連已急速邊緣化，玩完，公民黨疑似逢建設必反，自鳴清高，漸不受歡迎，民主黨一味嗌口號，再唔爭氣嘅話，益晒民建聯，何俊仁劉慧卿兩位阿哥阿姐，快啲自救！