陪伴成班60後、70後成長嘅大白兔糖，佢嘅製造商、上海最大嘅食品同奶類企業─光明食品，有意將旗下雲南英茂糖業分拆嚟香港上市，集資約25億至30億人民幣。嗯，到時大家買佢嘅股票時，唔知會唔會勾起童年時食大白兔糖嘅快樂回憶呢？
生產大白兔糖嘅光明食品董事長王宗南接受彭博資訊訪問時更畫出大藍圖，有意以3年時間將旗下食品業務重整，兼且安排喺香港整體上市。
同時亦會尋求收購海外企業，對象包括糖業、奶類同食品產銷企業。集團旗下光明乳業目前喺上海A股上市。
光明食品集團舊年盈利增長45%至32億元人仔，喺內地便利店市場更稱冠，市佔率達15.6%。