攞英格蘭球員先生嘅，係咪一定要係球星？又或者係咪一定踢大會？以前係，但今年就未必喇！
喺日前公佈嘅2011年英格蘭球員先生候選名單，最後6強雖則仲有曼聯後衞尼曼查維迪、曼城前鋒泰維斯、阿仙奴中場拿斯尼同埋熱刺中場加里夫巴利，其中加里夫巴利仲獲提名埋最佳年輕球員，但就唔見有朗尼、謝拉特、林伯、F托、杜奧巴或者法比加斯等呢啲球迷熟識嘅名字；取而代之係下季有可能會落英冠比賽嘅韋斯咸中場柏加同埋黑池中場查理阿當，唔怪得至今年嘅頒獎典禮俾人話騎呢啦！
英格蘭有兩個個人獎項，一個係由同行選出嚟嘅球員先生，另一個就係由記者選嘅足球先生。
6候選人見下游隊猛將
之前球員先生嘅得主，都係最top嘅，例如係簡東拿、舒利亞、雲尼斯達萊、亨利、C朗、傑斯同埋舊年嘅朗尼等。不過，今季英超班球星撞晒邪咁，唔係長時間受傷就係長時間冇表現，搞到今年入圍最後6強，夾雜咗查理阿當同埋柏加呢啲效力下游球隊嘅球員。
我求大俠收到風，話今季至係第一季打英超嘅查理阿當好有機會喺今個17號舉行嘅頒獎典禮上當選。呢個一度盛傳係利物浦收購目標嘅25歲蘇格蘭中場，喺今季攞咗11面黃牌，講真都幾茅，不過就喺29場波入咗10球；加上啲傳送鬼成咁靚，所以真係有望成為1983年嘅杜格利殊之後，第2個贏到呢個獎嘅蘇格蘭球員。但係，佢隊越踢越沉嘅黑池家喺英超排尾4，季尾好有可能降番落英冠，如果係真而佢又當選嘅話，就會創造歷史，成為史上第一個降班隊嘅球員先生，咪話唔騎呢。
泰維斯當選機會唔高
至於阿根廷嘅泰維斯本身係世界級球星，而且喺英超入咗19球，同埋幫曼城喺英超排第3及打入英足盃4強，如果由佢得到，應該係最正路；但問題係佢係阿根廷人，須知道英格蘭同阿根廷喺世界球壇係世仇，而且兩國又試過因爭福克蘭群島而打仗，啲恩怨成本電話簿咁厚，從陰謀論角度去諗，睇怕泰仔都冇乜機會。