馬來西亞一班飄移車手的世界排名相當高，不過甩尾甩咗咁多年，始終未有一個正式飄移場。有幸受邀到吉隆坡，實地感受由飄移王TJ創建的新場SpeedCityKL，一嚐220米大直路激劈入90度彎的恐怖體驗！
記者、攝影：徐影龍
鳴謝：SpeedCityKL
唔講唔知馬拉有大班甩尾車手，但居然連一個正式飄移場都無，全部比賽都係借場嚟改裝，玩完要還原做停車場。世界聞名嘅馬拉飄移王TJ（TengkuDjan），有感馬來西亞車手漸漸被泰國及印尼越過，好想為當地車手做番啲嘢，故斥資建立一個完善嘅飄移場，名為SpeedCityKL。
特設220米直路加速
場地最大特色係採用特長橢圓形設計，來回有一段近220米大直路畀你加速，以TJ踩盡架Silvia計，彎前極速超過130km/h！到埗當晚，TJ剛從杜拜鬥車返嚟，問我有無興趣坐佢車繞場一周？我已試盡James及Wing幾位香港飄移王嘅車，未驚過。點知助手遞出頭盔，我仲要好辛苦咁穿過防滾架先上到車，氣氛凝重得令我暗叫不妙！
第一圈WarmUp，無甩尾得個快字，好碎料啫！點知試圈完畢，TJ即刻嚟料，1、2波爆到上近萬轉，只聽到引擎怒吼聲，以及PatPat底下如爆炸般嘅連環爆油聲，入到3波飆上超過130km/h，準備甩入最激嘅90度彎，比環球影城嘅《盜墓迷城》過山車仲恐怖，嗰一刻我真係好後悔上車，只暗暗祈求TJ並非浪得虛名，讓我無穿無爛落番車！跟住左右密集急彎，雖有頭盔保護，但我依然撼到暈咁滯，淨係識捉實部DV繼續拍片。老細，有員工將生命託付於工作，算係咁喇啩！
飄移王TJ最得人心
隨住SpeedCityKL開幕，順勢拍住比賽搞手FXOpen搞咗首個飄移比賽，同場二十幾架車，大部份屬馬拉高手，亦有美國及俄羅斯等車手，連著名飄移車隊GoodYear都有份，相當有睇頭。
鬥咗兩日，TJ已甩到盡得人心，每逢出戰均特別多觀眾，全因佢實在太出名，加上主場之利，表現神勇，由圈速賽到兩車PK戰，都領先對手近一個車位，到最後四強先叫有得鬥吓，30萬港紙獎金近乎袋硬。可惜人算不如天算，最後冠軍戰，喺大好形勢下，中段架「飛雞」波箱突然失靈入唔到波，眼白白睇住同樣揸Silvia嘅阿輝爬頭走人，已經追唔番。雖然TJ最後屈居亞軍，但歡呼聲同人群爭相合照，已足證佢先係No.1。
官方網址： http://www.speedcitykl.com/