日本核危機遲遲未能解決，前晚更將超過萬噸輻射水排入大海，可能會加深投資者對核危機嘅憂慮，日股或會掉頭再插。
花旗股市前晚靠穩，道指企於12400樓上，技術形態進一步向好；港股近日走勢亦好強，成交配合升勢。資金流入美股、港股都幾明顯，恒指好大機會反覆推向25000關，內銀股將繼續領軍，會受資金追捧。
工行C輪27888：工行（1398）上日報收6.68元，升1.83%。股價由3月中開展嘅升勢好凌厲，配合成交嘅變化同內銀股整體升勢，工行今次突破7元機會大增，破位會上試7.30元，可以諗吓隻C輪27888。
隻輪現價43仙，2011年8月29日到期，行使價6.50元，溢價3.7%，引伸波幅26.4%，槓桿率15.5倍（有效8.2倍），正股升上7.30元，27888睇86.2仙，正股就算見7元，隻輪都有近5成升幅，正股跌穿6.50元就沽咗隻輪。
俊樺