環保觸覺主席譚凱邦（Roy）呢期咬實港鐵唔肯放，呢個星期日「港鐵競步行2011」喺中環舉行，佢又會帶隊踩場，喺皇后像廣場搞番個「踢走港鐵霸權競步行」，一於玩寸港鐵party。
阿Roy話，港鐵賺大錢大加票價已經人神共憤，仲要趕入則起發水樓，同埋利用旗下屋苑公契業權份數嘅優勢，打壓小業主成立法團，可謂無良大財團嘅典範。佢諷刺港鐵口號「心繫你的每一程」，實情係「賺盡你的每一蚊」，唔鬧唔得。所以呢個星期日上晝11點，佢會聯同民主黨、公民黨一齊由立法會起步行去特首辦請願，預計有300人參加，呼籲大家到時輕便運動裝上陣，齊齊踢走港鐵霸權。