日本被唔少香港人視為第二故鄉，因此當地受天災打擊，我哋覺得特別難過。不過坐喺度傷心冇用，八方知道有班熱心人坐言起行，喺兩個禮拜內籌集到約15噸物資，包括成萬條底褲、保暖內衣、尿片、午餐肉等，全部都係災民必需品，日內付運東京，最快本月中交到災民手上。
預計本月中運到仙台
發起呢次民間募集物資行動嘅其中一個負責人Louis同八方講，上月地震後從日本友人處得悉宮城縣仙台市係重災區，數以萬計災民極度缺乏維生物資，遂自告奮勇coldcall當地縣政府，提出捐助物資。
Louis話縣政府人員坦言人手不足，只能接受有條件捐獻，最好列出急需物資清單，再在香港照單籌集。
Louis冇異議，宮城方面即開列清單，所需物資包括尿片、衞生巾、厚襪、保暖內衣、男女裝內褲、杯麪、罐頭吞拿魚、午餐肉、罐頭腸及即食麥皮等。接到柯打，Louis隨即在網上號召各方人士認捐，唔使兩星期就達標，單係男裝內褲已超過5,200條，女裝有逾4,800條。40幾個義工上周末裝箱點貨，初時預計只租一個20呎長貨櫃，結果要加碼至40呎長，日內付運，預計下星期送抵東京，月中交畀仙台災民。
各國救援物資積壓東京，日本官員仲叫外國唔好捐物資，香港有人想送水聲稱無功而還，點解呢批貨可以直送災區呢？Louis話關鍵在必須搵啱日本對口單位：「我直接聯絡縣政府，佢哋有人在東京收貨，仲申請埋批文，可以利用救災通道運送，先至咁順利。」Louis又指其實重災區極度缺乏各種物資，「捐錢反而冇用，因為有錢都買唔到要嘅嘢。」
稍後籌備第二回募集
援日第一回超額完成，Louis卻話未安心：「等個櫃去到東京，再運到仙台，先算功德圓滿。」佢透露稍後會籌備第二回募集行動，「佢哋想要5,000個尼龍袋，即係紅白藍袋，畀災民搬屋用」。呢樣係香港特產，八方好有信心籌到足，災民放心呀！
mailto:[email protected]