深圳控股（604）嘅地產業務，迅速發展到深圳以外嘅地區，華華發現，遠至新疆喀什嘅偏遠小市，都有深控嘅足迹，唔通中國房地產熱真係咁熱辣辣，旺到去啲八、九、十線城市？
原來係另有原因嘅，據深控主席郭立民解釋，新疆係中央重點扶貧地方，全國都要加以援手，實行「翻叮」過往汶川大地震，一方有難八方支援嘅橋。而今次深圳市嘅扶貧對口城市係新疆喀什，深控亦本住企業社會責任參與其中。
不過佢強調項目嘅地價好平，近期當地嘅樓價亦飆升咗二、三十巴仙，最高去到每方米成7000蚊人仔，邊啲人買佢都答唔出，但肯定個項目只要賣到3000蚊人仔一方米，都已經有錢賺！