效力英超勁旅曼城嘅意大利前鋒巴洛迪利係公認嘅腦殘球星，做事唔經大腦，搞到自己犯眾憎。呢個加納裔球員近期試過喺練習時同隊友謝路美保定打交，以及亂鏟泰維斯，同埋搵飛鏢掟啲年輕球員；落到場後佢又無端白事攞紅牌，仲因為咁而搞到球隊喺歐霸盃16強出局。
唔知係咪俾領隊文仙尼鬧得多，巴洛迪利已開始有啲改善。日前佢揸住架瑪莎拉蒂去威，點知喺泊車嗰時揩花咗前面架車，呢個時候貌似紐卡素中場祖爾巴頓嘅後生仔行過嚟抽水，仲猛咁向佢展示個反V手勢（圖），但係巴洛迪利好似借咗聾耳陳隻耳咁，耷低頭扮聽唔到，冇還口亦都冇還手。係囉，忍一時風平靜，退一步海闊天空，巴洛迪利學識控制自己，唔會亂發脾氣，有助佢喺球壇嘅發展，希望佢繼續努力啦！