唔好話中聯辦官員只係識鬧本港傳媒「添亂」，好似中聯辦宣傳文體部部長郝鐵川，噚日就喺微博出聲，除咗關注《蘋果》一單爆料新聞，仲幫傳媒打工仔講說話。
了解傳媒運作
話說噚日《蘋果》踢爆鳳凰衞視去北京搞台慶，喺人民大會堂宴請嘉賓，點知嘉賓食到又屙又嘔要送院吊鹽水。呢單嘢係鳳凰衞視自己友爆料，出街後讀者嘩嘩聲，報料人急急上網解辯。
估唔到，郝部長對呢單都有睇法，噚日喺微博話：「有人抱怨香港媒體刻薄，我不這樣看。700萬人的城市就有40多家報紙，每天300多萬張報紙產量，5家以上的電視，4家以上電台，競爭激烈程度可想而知。」
佢又話：「媒體從業人員生存壓力太大了，不能吸引受眾的眼球怎麼活？」難得郝部長咁了解傳媒運作，不過，佢最尾都不忘加多句：「我不是為個別媒體不講社會責任而辯護。」