近期世界各地都發生唔少天災，日本地震引發嘅核危機就更加到家都未搞掂，日本向來係香港人嘅旅遊熱點，唔少人都發起慈善籌款活動，支持吓日本救援同重建嘅工作。
友邦保險（1299）最近就搞咗個活動，透過舉行慈善首映，將籌集得嘅錢全數畀香港紅十字會用嚟支援日本地震嘅救援、重建同救災工作。首映夜將會播出復活節檔期猛片《雷神奇俠》，故事係由Marvel漫畫改編，英文名係《Thor》，即係雷神，屬於古北歐神話掌管戰爭同農業嘅神。
摷番資料，原來雷神嘅寢宮閃電宮嘅所在地Thrudheim，意指力量嘅世界（WorldofStrength），睇落好似有啲意思咁喎。唔知友邦係咪因為咁嘅原因，所以特別揀呢套戲嚟做慈善首映呢？