日本核危機搞到連香港都全城恐慌，早排就見師奶盲目搶鹽，芬佬狠沽港股。正所謂上帝要你滅亡，必先令你瘋狂！華華就覺得，大家唔好成日自亂陣腳，淡定有錢剩，一於睇清楚形勢先至行動！
日本地震冇影響生意
好似喺大陸有經銷高檔日本車款凌志（Lexus）嘅中升控股（881）咁，話地震唔會影響佢哋嘅生意。華華真係諗唔明，事關凌志係進口靚車，唔係大陸本土製造，全部都要靠海外入口。雖則中升聲稱由日本入口嘅凌志只佔總數13%左右，其餘大部份嚟自其他地區，不過其他海外車廠都欠缺零件供應，仲捱到幾耐都成問題，情況似乎無中升諗得咁樂觀喎！
不過，華華有朋友上星期見過中升嘅管理層，終於為華華解開咗凌志不受影響之謎！據朋友引述中升人講，原來今次凌志生產嘅最受影響車款，喺大陸一直都唔好賣，原因係架車改壞名。吓？你無睇錯，的確係改壞名，事關架車型號叫「is250」，而喺文化源遠流長嘅中國，「250」原來係鬧人嘅說話（要讀「二百五」），有儍仔或者十三點嘅意思，所以架車就唔係好受歡迎喇！
聽講當年中升都有問凌志，改過個名得唔得，只可惜，連啱啱地震完都會照跟交通燈號過馬路嘅日本人，點會為你嗰少少嘢而改變佢哋做人嘅原則呢？所以名改唔成，凌志賣唔好，反而令中升今次避過一劫，真係塞翁失馬焉知非福嘅又一例證。
日本三大車廠，最近依然好努力籌備復產工作，只可惜仍然係處於一頭煙嘅階段。豐田噚日仲宣佈，連北美嘅14間廠，都因為無零件供應而要停產，今勻認真大鑊，唔知幾時會燒到去大陸嘅廠㖭。中升賣嘅豐田，95%都係內地本土採購，如果停廠潮蔓延到內地，仲有大把車股會受影響，各位缸中人要小心！
李華華
mailto:[email protected]