阿仙奴今季自從喺聯賽盃決賽俾伯明翰打皺咗之後，就表現麻麻，隊長法比加斯就更加不時受傷，而喺日前更加炒埋車（圖）㖭！不過，不幸中之大幸嘅，係呢名西班牙國腳中場除咗受驚之外，個人完全冇事，唔需要入院檢查。
話說喺周一英國時間朝早9點鬆啲，法比加斯正揸住佢架值10萬鎊（約125萬港元）嘅平治SL500去阿仙奴訓練場操練，點知中途原來整路，3線變兩線行車，但23歲嘅法比加斯就收唔切油，撞倒前面嘅AudiA3個籮柚，佢架黑色平治嘅車頭，就變成風琴咁。法比加斯冇大礙，仲識call拖車，佢亦順道搭架拖車去操練㖭！我求大俠唔係導人迷信，但既然法比加斯今次大步檻過，不妨考慮吓去還神兼用碌柚葉冲凉，等兵工廠轉運都好吖！