特首疑似被撞傷事件發生後,高官出入都好小心。政務司司長唐英年噚日下晝去一間位處後巷嘅食物銀行探訪,就搞到好大陣仗,後巷兩邊盡頭同附近一帶都有警員守住,仲有架衝鋒車隨時候命。唐唐逗留咗成個鐘先走,走嘅時候有G4傍住之外,警方、聖雅各福群會高層同埋民政總署人員一行十幾人護送佢上車,唔知真係以為搞緊啲乜嘢秘密任務。
唐唐架車噚日泊咗喺西營盤一條後巷對開,八方路過見到梗係八吓乜事啦。原來唐唐私下去睇吓食物銀行運作,但偏偏揀正間喺隱蔽後巷入面嘅,搞到西區警方如臨大敵,要一早佈陣,後巷中間、兩邊出口都有便衣警員睇實,其中一邊出口係一條長樓梯,為防出亂子,樓梯頂再多兩個軍裝守住,旁邊仲有架西區衝鋒車,方圓百米都有晒人睇實,真係辛苦晒。