黃英豪將金至尊搞到有聲有色之後，隨即搵IT奇才吳傑莊埋班，搞網上商店「淘至尊」，實行搵晒線上線下嘅錢。「個網站點解叫做淘至尊？淘，中文嘅意思係搵，即係畀你搵至尊產品咁解。」淘至尊上個月正式面世，除咗金、鑽石，仲有好多唔同嘅潮爆luxurygoods賣。剛開張，就撞正阿里巴巴（1688）嘅淘寶網出事，「唔同嘅，淘寶係一個平台，我哋係一個highend商城；況且，我哋本身係一個有實力嘅集團，頭炮同Angelababy合作之後，會搵100個藝人整個『至尊藝人店』，由曾志偉牽頭。」吳傑莊話，試業期間已經吸咗十幾萬會員，佢哋投資咗8位數字，估計好快回到本，仲有諗過分拆上市。咁佢哋賣嘅嘢夠唔夠潮同奢侈？iPad2一出，已經有廿幾部喺淘至尊辦公室等人買……嗯，應該都算入流。