多得家人影響，自小受盡流行音樂薰陶，嗜歌如命，亦愛分享，長大後繼續擴闊版圖。惜傳統媒體近年已轉型，開咪多過播歌；再者坊間資訊氾濫，想揀又分不清質素好壞。在哪裏找音樂？且慢！請來DJ黃志淙和梁德輝推介聽歌門路，中途碰巧遇上關勁松，老中青三支盲公竹啪啪作響，指點迷津！
記者：蔡俊業
攝影：王文忠、伍慶泉、譚盈傑
電台不再倚重播歌
中學時代，收音機長開商業二台，當時推介音樂是大方向，豈似現在只有重複的話語聲和大笑聲?!如今三家電台用來播歌的airtime買少見少，當年主持商台王牌音樂節目《豁達音樂天空》的黃志淙也承認，電台倚重播歌的日子俱往矣。「唔同時代真係有唔同嘅溝通方法，正式physical嘅timespace去播歌係少咗，呢個係不爭嘅事實！」八九十年代電台節目推廣音樂的盛況，從他當時接收音樂資訊的途徑便能夠反映，除了商台還有無綫多個音樂節目，包括《勁歌金曲》及《激光旋律》等，「仲有聽SamJor（左永然）喺港台主持嘅《樂在其中》，佢本身係一份經典周刊叫《MusicWeek》（音樂一周）嘅主編。呢本雜誌喺七八十年代教我哋聽英國樂隊PinkFloyd同Japan，比較前衞，但都有流行嘢例如OMD、HumanLeague等等。」志淙於1986年加入商台，那時所謂「1.0」的傳統媒體影響力依然巨大，去到九十年代《豁達》啟播，幾乎播甚麼紅甚麼，成為本地接觸外語音樂的重要指標。「當時我哋係一個主力媒體去播Suede，Suede就賣到嘭嘭聲，又嘭嘭聲過嚟香港開演唱會；我哋推介Radiohead，跟住又係嘭嘭聲嚟；之後仲有TheCranberries、Nirvana，又試過飛去英國訪問DavidBowie。94年胡士托25周年都有直擊，全球全港的首播我哋都搞好多，大家當時都哺住嚟聽！」計埋當年有份主持的DJ如陳輝虹、梁兆輝、陳嘉熙，連同隨後加入的卓韻芝和Inti等，都是本地電台推廣音樂的中流砥柱。
《Music120》成員
音樂台變真人騷
時代巨輪不停轉，九十年代中期起，翻版及非法下載接二連三；再者烽煙時事及財經節目相繼抬頭，為保盈利，電視台和電台兩大媒介昔日偏重音樂推廣的取向逐步減少。現為香港電台第二台主持音樂節目《騷動音樂》的梁德輝（Eric）指出，當下大眾根本不重視音樂節目，「聽眾唔會留意，因為覺得呢類節目悶，我唔承認係悶，我覺得佢哋下下都要lookfor一個punch。音樂節目講咩punch呢？我上次同一班o靚仔傾偈，佢哋話聽電台就係要笑，嘻嘻哈哈。就連電視台，你睇家MTV台做緊咩？唔係介紹音樂，而係做緊真人騷或者其他嘢。我唔覺得音樂節目有好大嘅改變，只係其他嘢已經變質，大眾唔再需要有深度嘅嘢。正因為咁，我一定要推介一個電台節目，我嘅好，梁兆輝嘅好，甚至係細蘇都好！」幫埋隔籬台宣傳咁癲？聽得出Eric心中那團火，火燄旺盛源於對本地音樂創作人的支持，也不值港人看扁本地音樂，「好多人話香港歌手唔得，其實可能只係佢哋無機會認識呢班人搞嘅音樂。例如盧凱彤首新歌《雀斑》，單係錄vocal就已經用咗一個月，錄完又改，但我哋可能只係用幾分鐘聽完，消費咗佢之後就算。但一個音樂節目真係應該畀時間等樂迷認識音樂人嘅心血，有時間我都會盡量畀佢哋講多啲，希望本地音樂得到多啲人尊重，好似Rubberband去年嘅《Connected》專輯，我畀時間佢哋介紹每一首track！」但當你眼見標榜力推本地流行及獨立音樂的商台，其音樂節目也買見少時（《不設劃位》及《組Band時間》先後於2009年停播），其他媒體想改變港人消費音樂的態度？比愚公移山更難。
亞視加碼音樂節目
沒想到世上還有愚公，就係亞視。這間港人眼中的「弱台」，去年底決定自製英文音樂節目《Music120》，12月首播，專播外國MV，是國際台多年來除了新聞外唯一自製節目，亦會安排在亞洲高清台播出。要追溯同類節目歷史，已經是九十年代由新城DJ郭偉安主持的《周末音樂快線》。監製周啟棠直認，四大唱片公司和無綫版稅爭拗未息造就此節目出現，但還有以下原因，「一來中文歌播放嘅渠道已有（《今夜星光燦爛》）；二來有一輪外語歌熱潮停咗，近一兩年又返番嚟，好似WonderGirls、AKB48等等好多都嚟香港開concert；三來香港好多唱片都係新曲加精選，出兩首新歌又賣成百蚊，外國歌手就無呢樣嘢出現，基本上全張唱片都係新嘅，令到班後生仔情願買外國碟。」細心看過《Music120》，竟然發現撰稿員是關勁松，即是在商台開咪主持影評及音樂節目《不設劃位》、前樂隊AMK成員及資深樂評人阿松。「每集兩個鐘，一個禮拜要寫96個Tags！」他說選歌方面沒有特別取向，主要是選擇已經不多，「一集播24首歌，邊有咁多存貨?!呢個節目係播MV同時，亦希望輸出歌手、樂隊嘅資訊、故事甚至趣事，增加觀眾對音樂嘅認識，唔會好似YouTube咁樣齋睇。自從香港趨向娛樂化之後，好多人都已經唔再重視知識，畢竟音樂都係一門有趣味同可供研究嘅學問！」
七大音樂接收頻道
1.亞視《Music120》
松：「你見我寫嘅稿都知，包含好多音樂資訊。好多人都唔知咩叫PostPunk、Dubstep等唔同音樂類型，透過主持介紹，再聽埋首歌，就可以有個概念，作為一個想深入少少認識外國音樂，係一個好嘅途徑。」
2.《AmericanIdol》
淙：「我會睇StarWorld，睇《AmericanIdol》已經睇咗10年，同埋又配合真人騷，唔好理真定假，但出到嚟啲人真係得。我聽過AdamLambert唱live真係好堅！」
3.四大電台節目
淙：「雖然聽到電台播音樂好似少咗，但都係環繞住音樂嘅流行文化做核心，加咗好多消費、潮流、搞笑嘢。當然我覺得可以做多啲音樂，所以先返嚟商台做節目！」推介：《ChiChung'sClass》、《騷動音樂》、《輝遊記》、《好回家》
4.兩本音樂雜誌
看音樂雜誌是其中一種認識音樂的門路，黃志淙就推介英國音樂雜誌《Songlines》及香港的《re:spect》。
5.有心唱片店
Eric：「ZOORecords老闆陽仔會介紹唱片喺邊度嚟、咩類型，好詳盡。去多幾次，佢就會推介一啲你鍾意嘅唱片畀你聽，好貼心！」（電話：23092911）
6.心水網站
Eric：「Review深入，訪問詳盡，音樂種類多。創辦人RyanSchreiber好勁，自從Ryan寫咗一篇評論推介加拿大嘅BrokenSocialScene後，隊band就上埋《DavidLetterman》，並衍生PitchforkEffect這個新詞。」（網址： http://Pitchfork.com）
7.2.0介面
淙：「我覺得facebook已經interface咗Soundcloud、YouTube、MySpace等喺裏面！」Soundcloud是一種新興的音樂分享平台，允許使用者透過網路介面輕易且快速地傳遞、發表及下載音樂；iPhone亦有不少程式讓你接觸外國音樂，志淙推介《Gigs》，筆者則推介英國爵士電台《JazzFM》。（ http://soundcloud.com、http://jazzfm.com）
